الحقيقة - دلع جيوفاني

أدري مشتاقين لي موت حتى ولو كنت أمس موجود"مشكلة لما أصير رومنسي"في البداية البرازيلي جيوفاني لاعب الهلال وهق عمره، مسوي ثقل وأنا محد قدي وترى رونالدينهو صديقي ولعبت مع ريفالدو قبل فترة"بلايستيشن"في إستراحتهم في ساوباولو، وخذلك من النصب... هذي الأمور خلت صديقه وولد ديرته المدرب كاندينو يقلب عليه، ويركنه في الاحتياط جنب الصويلح والبرقان وباقي الشلة.
المهم إن جيوفاني توقع أن صديقه كاندينو بعدما جابه من البرازيل يوقف معه ويصير له ظهر خاصة إن لوكسمبرغو طرده من سانتوس وقاله ما أبي شيبان في فريقي وفزع له قريبه في العمر كاندينو وقاله والله ما أخليها بخاطرك ورجلي على رجلك في الرياض ولا تزعل يا"جي جي"يدلع جيوفاني... بس في الفترة الأخيرة قلب عليه.
بصراحة أنا مع إن المدرب هو اللي يختار اللاعب بس لازم يكون هالموضوع حسب معايير"حلوة معايير"مثل حسب حاجة الفريق لخدماته"معقب هذا مو لاعب"ويكون سعره معقول مو الدعوة سمسرة في سمسرة.
حاولت مع مسئول الصفحة إني أكتب هالمقالة متأخرة يعني بعد مباراة الاتحاد والهلال أمس عشان أكون كاتب طازج"أكلة صارت"لكنه قال:"معصي"وعجل لأحط مكانها"مغلق للتقبيل"، مدري أحس إني متحمس كثير أكتب عنها مو عشاني...عشان قرائي وجمهوري اللي يواصلون الصبح وكل همهم يقرون مقالتي"الله يخليني لهم".
وعدنا باكر
ابن البلد
iabalad@maktoob.com