الحقيقة - "ما في هالبلد غير هالولد ؟!"

تصدقون احترنا في هالفرق والحكام ومباريات الحسم اللي ما فيها فريق ينهزم إلا ويقول الحكم هو السبب والخسارة، نتيجة مؤامرة والحكي اللي لا يودي ولا يجيب، بس زي إبر البنج، وللأسف ان كل الأندية ومسؤوليها صاروا على هالمنوال.
المهم القدساويون يقولون ان الحكم ابو زندة ظلمهم وطرد ثلاثة لاعبين من فريقهم، وان اللجنة بغت ترضي الهلال بعد"المردسة"وجابت لهم أكثر حكم يحبونه ويفوزون معه واللي قد أهداهم النهائي الكبير..."حق"النزهان الله يذكره بالخير، وهذا طبعاً على حسابهم وهم الضحية.
وان كنت أتفق معهم في شيء واحد فهو كثرة ما يدير ابو زنده مباريات الهلال على رغم بعض علامات الاستفهام اللي يطلقها مسؤولو الأندية عليه في مباريات"الزعيم"يعني كن ما في هالبلد غير هالولد؟!
لكن عشان نكون حقانيين ومنصفين ترى القادسية كان سيئاً وفرصة نادرة، وتحس انهم متوترين حيل وخاسرين قبل المباراة، أما الطرد، فاثنين صحيحة وما فيها"طقة عصا"والثالث إذا ما في تسلل فهو"برضه"صحيح... يعني الحكم برأيي ما كان سبب الخسارة، بل القادسية اللي لعبهم ما عندك أحد، والهلال كان أفضل وبس.
ردود
المكرمي: أقول الله يشفيك... وشكل عنوان الرسالة موجهة إلى نفسك!.
انس: انتقد بس لا تحلف وتجرح وتتهم ترى"محد"ناقص ذنوب... وبعدين هالتعصب هو اللي معدمكم ويخلي البعض كن ماله عقل لاحكي.
ابن البلد
iabalad@maktoob.com