جدة البلاد في ذكرى اليوم الوطني للمملكة العربية السعودية الذي يصادف يوم الاثنين المقبل ندعوكم لمشاركتنا قراءة هذه القصيدة التي ابدعها الشاعر عويد المطرفي حيث يقول : يا شعري افزع ما عن اليوم تصديد=اليوم يوم له مكانه وقيمه إن ما كتبنا فيه حلو الأناشيد=تلومنا شمس البلاد ونسيمه اليوم عيد وكل يوم لنا عيد=يوم الوطن فرحة وذكرى عظيمه يوم نعمره بالدعا والزغاريد=ندعي لابو تركي قوي الشكيمه عبدالعزيز موحد الشمل توحيد=بالدين هو والتضحية والعزيمه لم الشتات وجدد العهد تجديد=وكل النفوس اضحت بحكمه كريمه شيخ بحكمه مجد الدار تمجيد=حكيم راي ومن شيوخ حكيمه راس الزعامة مثل عنتر وابوزيد=ليث نهار الكون يرهب خصيمه صنديد ما هو مثل كل الصناديد=زود على تقواه رحمه وشيمه يوم الجزيرة بين فوضى وتشريد=نهارها خوف ومساها هضيمه جاها وهي مهره تقفز بلا قيد=وطوع صعوبتها وحط الوسيمه جاها يردد كلمة الحق ترديد=ونشر عليها الأمن والعز خيمه جاها وبدد ظلمة الليل تبديد=واشرق بها فجر الحياة السليمه عقب الجهل والظلم والخوف والكيد=صارت مثل للدولة المستقيمه صارت تحث الركب نهضه وتشييد=وخطواتها نحو التطور هميمه ورحل وخلف صادقين المواعيد=اهل الوفا والتضحيات الجسيمه مجسدين العزم والصدق تجسيد=ساروا بموطنهم وزادوا نعيمه من مات منهم يرحمه مسقي البيد=واللي بقى منهم عسى الله يديمه في ظل عبدالله زعيم الصناديد=صارت لنا هيبة عظيمة وقيمه نقطف زهور اخلاصنا والعناقيد=ونحيا الحياة الراضية والكريمه امن ورخا وانعام من دون تحديد=العدل مبدأ والشريعة مقيمه في ظل وافين الخصال الاماجيد=آل السعود اهل القلوب الرحيمه يحيا الملك لاهل الوطن والوطن سيد=ويحيا الوطن شامخ وزايد نعيمه
