(روح الجيل )

ياليل الجمعه النسمه حسايف والخبر ساطور
لكن درع القلوب المطمئنه كثرت التهليل
بكى ليل الوطن حتى المشارق وانبلاج النور
وبكى صبح الوطن حتى تدثر في عباة الليل
بكتك التوسعه والجهد في بيت الله المعمور
وبكتك النهضه الي من كلآفتها تهد الحيل
بكتك اغلى العواصم والمدن تبكيك واهل الدور
ويبكيك الضعيف الي عطيته دون حط وشيل
بكتك الجامعات وشعبك الي كنت دونه صور
بكاك القدس والشام الجريح وكل شهم اصيل
ابونا يا ابونا يا ابونا كل شي مكسور
من الخاطر الى الناظر من الدمعه الى المنديل
ترا شعبك بعد موتك عمر لك في الصدور قبور
كأن الشعب كله كان جيلك وانت روح الجيل
رحمك الله رحمه واسعه واسكنك بين الحور
بجاه الي بعث فينا يبلّغ محكم التنزيل
فمان الله يامن سادنا حبه بدون شعور
لو ان الدمع ينفع كان سيلنا المحاجر سيل