خيّال

بعد ..وش باقي بقلبك ولا انقال =خلص كل الكلام او ناوي تقول
اذا هذا غلا واحساس وشحال = لو تقرر تسل الكره مصقول
واذا هذي محبة ماهو هبال= ابد ما عاد في هالارض مهبول
عبث هذا الغرام وعالم اهوال =تودّ وتخلص وتلقاك مسؤول
بلاده موحشة ودروبه طوال = ولابه منزل تلقاه منزول
معازيبه دهر والضيف رحال=يناديه العمر لغياب.لأفول
وانا اللي من مضيفه ذقت الانكال=شربت الحزن مر وقلت معسول
وردت الجمّ ابي للريق بلال= تركت الجمّ من لقياي معلول
حكوا عنّي سراة الليل خيال=يشقشق هالعتم والسيف مسلول
بعينه ما تسولف فيه الآجال= بصمته للألم خلخال وحجول
رحل له في عتيم الاسود اشعال=مثل جمر الغضى في آخر ايلول
به غياب يشلّ اطراف الأمال=جريح ومعدم ومنهك ومخذول
وانا واقف على حروفك ولا زال= لصوتك بي صدى عابث ومجهول
من انت.وكيف انت..وليش تختال = بتجريح الوفا اللي صابه ذبول
وانا ما اقوى لعهدي فيك اغتال=على طهر النوايا جيت مجبول
احبك وان بكيتك وجد واطلال=لأني عند ربي عنك مسؤول