(عصافير الاحساس)

احد شعراء القصيم الجميلين يتواصل معنا لاول مرة ويخص قراء (ملامح صبح) بقصيدته ( عصافير الاحساس ) التي تجسد التجربة الشعرية الثرية التي يستند عليها ومع شكرنا وترحيبنا له وبه ندعوكم لتشاركونا قراءته حيث يقول:
لا باس يا اللي طالني من ظنونك = شكٍ ملا خاطر عصافير الاحساس
تمون ، وانت اغلى ، ولا يشبهونك = إشرَه ، وشرهة من نحبه على الراس
يا علني فدوة غلاك و جنونك = ما عاش بالخفاق غيرك من الناس
وش خانة الحب الحقيقي بدونك = يا اللي رقى حبك وحوّل بالانفاس
شفت العتب واعرف سوالف عيونك = واقرا حجاجك لا تنومس او انحاس
عينك ليا منّي لمحتك تخونك = اجمل عيوبك انك انسان حساس
يبين في رجفة يدينك ولونك = لو للشحوب اطماع في هزة الكاس
لا تنثره ،، عذالنا يحترونك = ماتوا قهر ما حصّلوا غير الافلاس
انا حبيبٍ يحترمك و يصونك = لا يخدعك ظنٍ تبادر لوسواس
يبطون ما وصلوا مداي و ظنونك = وانا حبيبك ،، قل لخاطرك ( لاباس )