قصيدة “الصدق منجاة” للشاعر الكبير ” عبدالكريم الجباري”

- أريج الشمري
حنا بخير وستر والحمد لله
مجملين ربوعنا واخويانا
••
لاندور الزوده ولاندورالجاه
ماندور الا حاجه الي نصانا
••
اليا قدرنا كل جهدٍ بذلناه
واليا عجزنا نلحقه في دعانا
••
من جا لنا نسعده وندور رضاه
ونوجب الطيب ولو مادعانا
••
يوم ان من يفعل يبي شخص يجزاه
حنا من الخالق ندور جزانا
••
ماهمنا وش مكسب الي فعلناه
لو كان كثر مدحنا او هجانا
••
شي مهو لله يغديبه الله
لو انه اكبر من مساحه سمانا
••
كم واحدٍ سقنا له الدلو ورشاه
اسقى معاطيشه وغثرب بمانا
••
وكم واحدٍ بالود جانا وجيناه
نامن به الغره ويطعن قفانا
••
وكم واحد حنا بغفله نسيناه
ونلقاه اطيب مننا مانسانا
••
وكم واحد يستغفل العقل بحكاه
وحنا نسلك له على مشتهانا
••
ماهو امشينا بكيفه ومشهاه
حنا نعرف دروبنا مع خطانا
••
لو كان جايب كل حيله من اقصاه
يبطي بوسع صدورنا ماقصانا
••
يوم انها مع جره الذيب وعواه
مابين نيبانه نحصل عشانا
••
واليوم قام الذيب يمشي مع الشاه
نجاري الدنيا مهو في رضانا
••
نقبل جباهٍ ونستثني جباه
وكم لحيةٍ عنها نكرم لحانا
••
والي وطا طرف الرجاجيل تاطاه
ويالله لاتفرح علينا عدانا
••
الصدق لو هو يزعل الناس منجاه
يمكن نموت ولالحقنا هوانا
..
الشاعر : عبدالكريم الجباري..