شلون شفت ريشاني يا بيسيرو؟

ما ودنا نكثر اللطم والولولة عشان الواحد لازم يحافظ على نفسه من بعض الامور اللي تمغص الكبد، كثير شغلات ما تعرف لها تفسير لا فكرت فيها تحس ان خلايا مخك تقوم تصادم وتلاطم كنها طريق خريص لا جاه مطر، وقامت السيارات تلف يمين ويسار وتصادم بعضها وتصير حوسة ما بعدها حوسة، وحلني على بال ما يجيك الدفاع المدني؛ لذلك ننصحك بأن تنحاش قبل لا تغرق ويقولون لا مت الله يرحمه مات غرقان بنفق، والا تحت كوبري في سيارته، الواحد ودك يريح راسه وزي ما تجي تجي، ترى الانسان اللي يفكر بقوة وحماس واخلاص يلاقي نفسه مولي ورايح فيها ومضيع وقته بس مشاوير بين الصيدليات والاطباء اللي بعد هم الثانيين اردى وازفت من انفاق الرياض، اللي صار اسمهم من تالي انفاق الشلالات، قبل كم يوم اعلنت الاخبار ان بيسيرو مدرب منتخبنا اختار تشكيلة المنتخب اللي يقولون لنا حقين الاتحاد السعودي انهم اتركوه بكيفه هو اللي يختار اللاعبين بنفسه، ولا تدخلوا بالتشكيلة ولا عطوه التشكيلة جاهزة، وحنا نصدق ربعنا في الاتحاد السعودي، واكيد انهم يعرفون مضرة لا جبت مدرب وقمت تفرض عليه اسماء لاعبين مفروضين عليه فرض، حتى لو اخترت له احسن لاعبين بالعالم ما راح يدربهم من نفس، لان ما فيه مدرب بالعالم يقبل ان ينفرض عليه اسماء لاعبين، حنا ما نشكك بهالشي ونتوقع اننا صرنا اكبر من هالشغلات اللي ولى زمنها وراح، لأن المدربين مو سعوديين يسكتون ويمشون السالفة، هذولا مدربين عالميين لا راحوا بلدهم قالوا اللي نفسهم يقولونه ولا احد يقدر يقول لهم ثلث الثلاثة كم، بس الشي اللي ما يخش المخ شلون الاستاذ بيسيرو (مدري ينقال له استاذ والا كوتش والا كابتن) المهم ان الكوتش بيسيرو اختار لاعبين تقدر تحلف يا عزيزي القاري انه ما شافهم يلعبون، ولا حتى شافهم يدقدقون كورة بدقة الاحتياط، شلون شفت يا بيسيرو علاء ريشاني؟ اول ما قالوا اسمه بالاخبار انه ضمن تشيكله منتخبنا قلت اكيد بيسيرو تطور وجاب هالاعب من الدرجة الثانية اللي ما تنقل مبارياتهم حتى لو بالراديو، اثاريه طلع لاعب احتياط بالنادي الاهلي، وشلون يا بيسيرو اعجبك لعب عبداللطيف الغنام والا حسن خيرات والا عبدالله معيوف، حنا ما نقول فيهم كاشخاص شي ويمكن انهم اطلق ناس بالدنيا، بس لاجينا نحكي عن الكورة اللي يسمونها كرة القدم وقضينا كل عمرنا نطارد وراها في الحواري نقول لك يا بيسيرو راجع امورك قبل لا تطيح الفاس بالراس، ترى هذا منتخب بلد مو اي كلام، اللاعب الزين كلن يعرفه ما يحتاج مدرب، نص تشكيلة هالمدرب الله يستر منها.