اسمحولي واسمعوني زين واعطوني مجالي قبل ما ابدا في الكلام الي تحريتوا سماعه *** يا لبيب العقل فرق في حرام وفي حلالي لا تقول ان الحياه دروس والعالم بضاعه *** عش حياتك كل ابوها في رضاء عز الجلالي خالق عباده ويامرنا على سمعً وطاعه *** وانتبه من عاقبة الايام ما فيها مجالي لا تشمت بالعرب تاتيك ما منها مناعه *** ولا تصيغر لك كبير ولا تهزاء بالرجالي من تبع سوق الرخيص بباخس الاثمان باعه *** ولا تقول انك من العراف حماي التوالي كان ماعندك صلابة راس يا زين الوقاعه *** واحذر الي كل ما حاكاك بفلانً حكالي ايتنقل في المجالس بالحكاوي واللكاعه *** لين ولع نار فتنه وان غدا لنار صالي انقلب مثل النعامه دس راسه معْ كراعه *** انتبه له واحذر تماشيه في مرً وحالي معّ مثل هذا يا ابن لاجواد يا زين القطاعه *** وان دخلت السوق ميز في الجنيه وفي الريالي قبل ما تنشب تحسب المال في جيبك وداعه *** وانتق المنسب قبل تنشب ولا فيها جدالي عقب الي ما يعرب منسبه عمره ضياعه *** وان تفاخرت بجدودك خل في فخرك عدالي لا تحط جدودك ملوك الجزيره بالبراعه *** مات جدك وانت تبكي لا تشيل ولا تشالي يمكن انك بين خلق الله ما تسوى جراعه *** افرق بفعلٍ يميز وقفتك باول وتالي لين تذكرك العرب ذكرك لجدك في الاذاعه *** والخوي القرم فاده بالحلال وبالعيالي كل رجلً من جليسه والبحر يعرف شراعه *** وان بلاك الله بغلطه من ولد عمً مصالي ادمح الزلات لا تقعد تدور للفراعه *** ابن عمك محزمك لا شانت وجيه الليالي اعطه القدر الرفيع ومن رفاعه في رفاعه *** خلك الصدر الرحيب وكل حملً له جمالي وافزع ان جاء لازمه و لا تقول الوقت باعه *** والله انه ما يعزك في الزمن لامنه مالي غير اخوك وصلب جدانك مواريث الشجاعه *** لا تقول البنك فيه وفيه وعيالي ومالي ما تسرك كل ابوها لا غدا للمر ساعه *** احتزم بالمحزم المليان وافين الفعالي يوم ذيب الجوع في المرقاب ما ياكل ذراعه *** والكلام الصدق عند اهل الفعول من الرجالي مثل براقً يقدي ساري الظلما شعاعه
