هذي مواري الشعر سجه ومسباح وهذا هجوس الشاعر ابرى صميمه وهذا القلم بيدي وهذيك الألواح تشكي نزيف الحبر تنعى قديمه وذيك المشاعر تدمي عروقي جراح يارحمة الله مارضيت الظليمه أشوفها توي تبجح تبجاح واقول يا جعل العواقب سليمه ثم اتمثل في خيالاتي أشباح وأصد خوفي لأرتكب لي جريمه أخاف لأسرف ثم تقولون سفاح واصير سالف للغريم وغريمه واخاف من قولة مواريده شحاح وانا الكريم الي هجوسه كريمه لو إن فكري بير والحرف مياح ماكان في أرض القصايد وخيمه لكن وش ذنبي وحظي له جناح لشافني ينفر يذب الخريمه راحت سنين العمر أومي بملواح ومحاولتي كل ابوها عديمه لان السبب بين وباقول بإيضاح أعلامنا إعاقته مستديمه والا قنوف الشعر براقها لاح وهمالها ديمه ليا قيل ديمه يابو سعيد اصبر وحزنك بينزاح الصبر مزبان النفوس العظيمه يا عنك والله ماعلى الارض مرتاح صكات بقعا كل يومٍ مقيمه الوقت فيه من الحزن كثر الافراح لا فيه نخوه لا ولا فيه شيمه والليل لو طول فتاليه الإصباح النور نور والعتيمه عتيمه وثنتين راس المال والباقي ارباح الدين والصحه يمال الغنيمه وأشد من غربة وطن غربة ارواح واكبر من هموم الرجال العزيمه والموت ماهو طعنة سيوف وارماح الموت من ذاق الغبن والهزيمه ياصاح وانقل عني العلم يا صاح النار تاكل من حطبها الهشيمه .. مجمد بن دوحان ..
