عبدالله الملك يحب الشعب

عبدالله الملك يحب الشعب
الوطن والشعب يومه يوم عيد بعودتك يا ابن موحدها وبانيها ...
الحمد لله على عودتك سالما معافىً وهنيئا للملكة بعودة عاهلها الملك عبدالله الإمام ابن الإمام موحد الشتات وباني أركانها عبدالعزيز...
الوطن بمن فيه يابو متعب يردد قول الشاعر:
مرحبا حييت يانور الجزيرة ....... عد ماهلت مزون وأمطرنا.
غيابك يابومتعب لايشبه غياب غيرك من الزعماء ، وبعضهم يغيب ويحظر وكلها متساوية ... وصدق من قال :
وين اللي ليغاب غابوا كلهم .... وين اللي ليغاب محد (ن) درى به.
فرحتنا بعودتك يا ملكنا تجعلنا نتذكر مرارة غيابك بعيدا عن شعبك وأرضك ونحن نعرف ونحس بمرارتها عليك ...
فمن لغيرك يابو متعب تدمع العين وأنت تودع الشعب وتعتذر عن عدم وقوفك للتحية والسلام ؟؟
ومن لغيرك يابو متعب تذرف العين صافيها وانت تقول انكانكم بخير فأنا بخير ؟؟
ومن على غيرك ياوالد الشعب السعودي يضيق البال وأنت خارج بلادك للعلاج وندري ان قلبك معنا وعيونك علينا ؟
ندري ياملك ماهمك آلام الظهر ولا همك عرق النسأ ولا غيرها ولكن كان همك حنا يا عيالك وبناتك وإخوانك وربعك وديرتك وكل العرب....
والله ياملك نقول لك حنا ماعلينا دامك ملكنا ودام عافيتك طيبة فهذا كل اللي يهمنا وحنا بخير وعافية من فضل ربي...
بعدك يابو متعب ضاقت علينا بلادنا الواسعة رغم مساحتها الشاسعة لأنك ياملك تحبها وتحب أهلها
فاعتز بك الشعب واحبك عبر مسيرتك الطويلة ..
بلادنا ياملك هي الأرض وهي السماء وهي الهواء وهي الإنسان.... وكلها تدعوا لك بالصحة والعافية وتقول يامرحبا يامسهلا ياهلا ياعز غالي.... وتقول رحم الله والدك والدنا الإمام عبدالعزيز موحدنا وباني مملكتنا ...
نغليك والله ياملك لأنك بأخلاقك وشهامتك إنساناً أعلى من ملك ، تبادلنا الوفاء ، تحبنا وتغلينا وتوصي علينا كل مسؤول سواء انك بعيد وراء البحار أوقريب ومعنا في الرياض...
إحساسنا يابو متعب يقول ان مافيه شيء يكدر خاطرك أكثر من أن يصيب احدنا مكروه أو ضيم من أي احد أو ينقصه شيء
وأنت ماتدري أو ماحد قال لك عنه...
صحيح انك ملك ولكنك تختلف عن كل الزعماء وميزتك عن غيرك أن همك الأول والأخير هو
شعبك وأمنه ورفاهيته وسلامته من كل سوء وخطر...
هل تدري ياملك عبدالله ليه نحبك ونفتخر بك ؟ لأنك أبونا العادل ولأنك تتحدث إلينا بصدق وبتواضع واللي بخاطرك تقوله لنا بسجيتك وفطرتك ولأنك دائما قريب من مشاعرنا وهمومنا ....
بعد ماسافرت عنا ياملك ليلنا بعدك طويل ونهارنا شمسه حجبها الغبار وكل مابدى القمر قلنا يامتعب ياخالد يامشعل ياتركي يامنصور ويا بدر وش اخبار أبونا عبدالله وكيف حاله؟؟!!
مانقدر نشوفه ويشوفنا لو عبر ساتل أو مقطع وسائط لو مرة في كل يوم انتطمن على ملكنا وأبونا ونقول له حنا بخير إذا أنت بخير مثل ماعلمتنا وأنت تعاني من الألم ؟؟
قالوا لنا الملك طيب وبصحة من فضل ربي ويقول ترى اذا انتوا ماتشوفونه فهو يشوفكم في داخله لأنكم في قلبه وفي عيونه وهذا هو فقط علاجه وجرعة دواه ، اطمئنوا الملك وقت الجراحة كل شيء فيه نام إلا قلبه ينبض بذكر الله ثم بحبكم صغيركم والكبير... إلا إن ما حصل في جدة من فيضان السيول وإهمال المهملين وغياب الضمير أتعبت نفس الملك وكدرت خاطره وماجاه نوم وخفنا عليه وماعاد قدرنا نحط عيوننا بعيونه وحسينا إن بخاطرة شيء وشيء وأشياء كثيرة.....
فرحنا والله ياملك وابتهجنا وقلنا ايييييه ذاك ابو متعب جعل الردي يفداه وراسه الباقي وبمشيئة الله ان تُسعد الشعب شوفته وتلويح يمناه وتطبيق حكم الله وتصليح النظام ....
الوطن والشعب يومه يوم عيد بعودتك يا ابن موحدها وبانيها ...
بعودتك وبشوفتك يابو متعب وأنت شامخ وبصحة وسلامه أزال عنا التعب والنكد وتنغيص أحداث العرب ....
كل الوطن مشتاق لشوفتك يا أغلى ملك ... كل الشعب يثق فيك ويعرف قوة اهتمامك وصدق توجيهاتك لخدمتة وحفظ أمنه وتطوير المملكة ومواطنيها... والله نعرف هذا الشيء يابو متعب وكلنا ثقة انك ستقود سفينتا مستعينا بالله في هذه الظروف الصعبة والأخطار المدلهمة بحكمة عبدالعزيز وحزم عبدالله وتعبر بإذن الله هذه الأمواج العاتية المخيفة ثم ترسي بها في ميناء آمن جديد ، وساحل نظيف ، نقي بعيدا عن كل عدو وكل فاسد ومتهاون ومتخاذل ومستذكي لايعرف قيمة الوطن ولا يقدر تعب الأجداد في توحيده.
...........
ياكثر ما قرع طبل الحرب كل صبح وهجاد
يوم عبدالعزيز يوحدها ويبنيها.
اما اليوم فعودة ابو متعب لها نشوة فرح واغتباط وشكر لله سبحانه وهذه الفرحة تذكرنا بحربية العرضة الشهيرة صباح فتح الرياض للشاعر الحوطي الذي عاش بالمزاحمية ومنها:
دار ياللي سعدها تو ماجاها =عقب ماهي ذليلة جالها هيبه
جو هل الدين والتوحيد وحماها=واذهب الله هل الباطل واصاحيبه
قام عبدالعزيز وشاد مبناها=شيخنا اللي بحكم الشرع يمشي به
يوم حنت ورنت سمع شكواها =وصلها قبل تاصلها مناديبه
عقب ماهي عجوز جدد اصباها=زينها للعرب قامت تماري به
يوم شفته بعيني طاب ممساها=طير حوران شاقتني مضاريبه
.................................
اللهم طول عمر الملك عبدالله على طاعتك ومتعه بالصحة والعافية والقوة وأحفظ الشعب السعودي في حماك... قولوا آمين .
عبدالله العابسي
alfalcon1@windowslive.com