الله يشفي أحلام ..إن كان صدق ولا كذب!

خلاص لا احد يحاول يقنعني اصدق أي خبر، ما عاد فيني ثقة باي خبر، وبالذات لا صار خبر يتعلق بالصحة وسوالف الصحة، وكالات الانباء يتجاكرون كلن يبي يسبق الثاني في نشر التهاويل عشان يحسسون الناس اللي تدفع لهم قروش ومشتركين معاهم انهم وكالات سنعة والحقيقة اننا بدينا نشك انهم وكالات ما عندك احد، تقرأ خبر وتحس من كثر ما هو منسم ورايح فيها ان اللي كاتبه بزر ما يتعدا عمره عشرة أعوام وللحين متأثر بقصص عدنان ولينا، وممكن يجيب لك خبر عن بزر متعلق بطيارة ومتمسك بجناحها باصابع رجليه زي ما سوى عدنان يوم خطفوا لينا بالطيارة طمر والا هو فوق ظهر الطيارة ويوم حس الطيار ان عدنان فوق طيارته دز وزود السرعة يبي عدنان يلفحه الهوى ويطيح لكن ربك ستر وقبل لا يطيح مسك طرف الجناح باصابع رجله عشان يديه ماسكه الرمح حقه، تخيلوا وكالة زي رويترز باثه خبر يقول ان فقدان الوزن بسرعه يحقق نتايج تدوم اكثر، وحنا يالسعوديين من خلال خبرتنا لأعوام طويلة بالريجيم طول عمرنا نعرف ان فقد الوزن بسرعة يسبب بلاوي صحية ما لها اول ولا تالي، الحين توهقنا، وش نسوي، ما لنا غناة عن الريجيم وهذولا بخبرهم حاسونا الله يحوسهم!