وش عندكم غير التحذيرات؟

تقرون زيي التحذيرات اللي كل شوي تصفقكم فيها هيئة الغذاء والدواء، مدري وش اسمها، وطبيعي إننا ما نعرف اسمها؛ لأنها بسلامتها لو مرت من جنبنا ما عرفناها، ومن زمان وأنا أقول إني بحط جايزة بعير محشي بخروف لبني، والخروف محشي بديك رومي، والديك محشي بدجاج مذبوح كنه مخنوق خنق إذا فيه منكم واحد يعرف رقم تلفونهم أو يعرف شخص منهم لا شاف شي يضر ينباع في السوق إنه يقدر يدق عليهم ويشتكي، ما لك غير تفرش سجادتك قبلة وترقعهم بكم دعوة من قلب، كل أسبوع أسبوعين نقرأ بالجرايد إن هيئة الغذاء والدواء تحذر من الدواء الفلاني أو الغذاء العلاني بعد ما نكون قد لحطنا منه في بطونا لين قلنا بس، اللي يوجع قلبك ويخلي لمبة تولع بمخك إن هالأدوية اللي تضر بخلق الله أو الأغذية من سمح بدخولها من الأساس؟ اللهم إني صائم الواحد ما وده يلطم ويزاعق وهو صايم وما له نفس يزعل ويتضايق لكن تمر عليك شغلات تخليك غصب تطنقر وتورم خدودك من الزعل، إلى متى وحنا طقها وألحقها وشغالين بالبركة، إلى متى وحنا مدرعمين ما ندري وش اللي يضر وش اللي ينفع، أقدر أحلف إني لو آخذ لفة بكم صيدلية وبكم سوق أني غير ألاقي آلاف الشغلات اللي تسبب بلاوي بصحة الناس الله لا يضر مسلم ترى صحة الناس أمانة كبيرة وما هي مكاتب وتبطح قدام المكيفات وتصاريح مزخرفة للصحف، حطوا عقوبات، حطوا أنظمة زي الناس تخلي اللي يفكر يبيع هالشغلات تمغصه بطنه قبل لا يعدم صحة المساكين اللي مالهم غير الله سبحانه،خلونا نقوم نشوف شغلنا تعبنا من المصايح، عن إذنكم!