بنات القمل!

تخيل زوجتك والا بنتك – الله لايسمح - يوم تنزل للصيدليه تطلب منك تجيب لها قزازة قمل، وش راح يكون ردة فعلك؟ اكيد تحرك على طول لاقرب مستشفى نفسي، ماكان الواحد يتخيل انه يجي يوم ويقرا اخبار زي كذا، بعض الحريم عليهم طلعات ماتدري من وين يجيبونها، الحين صار القمل يطول الشعر ولقن فيه علاج، ياسبحان ربي، يوم سمعت بالخبر انصفر وجهي، وادعي من قلبي ان هالخبر ماينتشر وحنا مو ناقصين اخبار غريبة تنتشر عنا، بعدين منهو هالزوج اللي يقبل بحرمه راسها مليان زحمة قمل، قمله عاكسه الشارع، وقمله تاركه العلاج اللي هي مجيوبه على شانه وجالسه تدق حنك مع زميلتها، وقمله ودها تهرب تبي كشه ارحم من الكشه اللي تورطت فيها، وقمله خاينه قاعده تخرب شعر عمتها، وش يضمن للبنت الهبلة اللي حاطة على راسها قمل ان هالقمل عارفن وشهو جاي عشانه، خبرنا الحريم يحطن طماطم على خششهن، يحطن ليمون، ويالله بعد الرجال يهضمون ان حريمهم يسوون كذا، وشلون يقبلون ان حريمهم يحطون قمل بروسهن الله لايبلانا، بدال الحرمه ماتحمد الله على العافية والستر تقوم تقامز تدور زين الشعر من ورى القمل، تمنيت ان هالخبر طلع كذب، البنت الصاحية ماتصير صداقة كل ماسمعت بخرافة راحت تطامر تجرب بنفسها، يازمان العجايب وش بقى ماظهر، الله المستعان.