الأرصاد.. بالمرصاد!

ما شاء الله عليكم صراحة يالارصاد.. انا احب من هالمنبر اني اهنيكم على هالرؤية بعيدة المدى خصوصا انكم علمتونا شي مهم في الحياة وهو ان الركادة زينة والمنخفض الجوي اللي يجيك منه ريح سده بتحذير واستريح، صراحة هذا الكلام ولا بلاش.. لأنكم اذا علمتونا متأخرين بيستلمونك العالم في الجرايد ويتشرهون عليكم.. وبيني وبينكم ازين لكم تحذرون الناس من شي ولا يصير بدل ما يصير شي قبل ما تعطونهم خبر!
اللي طرا لي هالسالفة التحذير اللي جا قبل كم يوم، وطبعا الشباب في البلاك بيري ما قصروا لأن كل واحد يجيه الموضوع يزود عليه شوي ويرجع يرسله، الين خلوه تسونامي الا شوي.. واحلى شي واحد حاط صورة سحابة سودا وش كبرها ويقول هذي هي السحابة اللي بتجينا بعد ساعتين من الحين.. بتطالع في ساعتك وتكتشف ان باقي على الموعد اللي هو قاله 14 دقيقة.. اللي عنده مواعيد يكنسلها، واللي عنده دوام ياخد اجازة اضطرارية لأسباب مناخية، واللي بيقابل صديقه بيتصل عليه ويقول له ترى اللي بيننا انتهى يالحبيب، ويا روح ما بعدك روح.. ناس تروح تشتري مظلات وقوارب، وناس تتعلم السباحة والغطس، وناس تستنفر وناس.. لحظة يا عمي، خلصت الساعتين والربع ساعة والنهار كله.. والدنيا شمس، صار على هالسالفة اسبوع ولا جانا شي.. عزيزتي الارصاد.. تبونا نتخيل السالفة بس يعني؟!