عاير القصمان

* اليوم الجمعة.. يوم عظيم.. انطلق فيه مع ربوع «شمس».. في «عاير القصمان» لأكون معكم أو تكونوا معي.. المهم أن نكون معا.. واسمحوا لي يا قراء يا من أنتم من خارج النظام
«هذه العاير خاص بالقصمان» لذلك فاللهجة قصيمية بحتة وأدري به ناس شروفين!
* يوم إن التعاون قروشه شويه.. ليه ما يمد إيده على قدر الحافه! معسكرات بقلايع وادرين.. وآخرته يطلع السراح ويشكي الحال!!
* حرنابهم.. الإدارة تقول إن عثمان إدريسا بوه إصابة.. واللاعب يقول أبد ما بي إلا العافية.. إذا ما بوه شيء.. خلوه تراكم منتب لاقين مثله.. الا كان قروشكم إكثرت بهالفايت!
* هالحين اللاعب محمد الراشد جلد بالقدد.. والمدافعين مطاير بساقته.. ومدرب المنتخب مستكثر عليه ضمه المنتخب.. والله لو أبحلف لو أن الراشد بنادي غير التعاون كان مضموم للمنتخب.. اللهم لآلي!!!
* مدري وراه إدارة الرائد متيله بعض اللاعبين ماخلتهم يدورن لقمة العيش بأندية ثانية ويسترزقون.. تهقون هم خايفين منهم والا عليهم!!
* يقول إنه مدير العلاقات العامة بالرائد.. وأشوفه بساقة التعاونيين وين مايروحون يتدقس وراهم.. حتى مزايين الإبل شافته!
* يقول الدكتور خالد نعمان إن ملعب التعليم بعنيزة ما يصلح للعب الكورة بعد ما أصيب لاعبا التعاون برباط صليبي.. أغديهم ينهضون ويصلحون الملعب يادكتور!
* التعاون والرائد والحزم بالممتاز والنجمة بالأولى والعربي والتقدم والرمة بالثانية والصقر والأمل اليوم يلعبون لقاء البطولة بينهم.. هالتطور اللي صاير بالقصيم بفضل الله ثم بفضل عبدالعزيز السناني من يوم مسك إدارة مكتب رعاية الشباب بالقصيم والتطور بزود ما شاء الله.
* ياكافي الحزم من يوم راح خالد البلطان هفا.. معقوله مابه أحد من أهل الرس يفزع للنادي ترى الناس نقاده.. كوده بس مهب منحوت!
* نلتقي الجمعة القابلة!!