عطني كرتك!

على قد ما عمل خير هالبني آدم اللي اخترع سالفة البزنس كارد، وخلا الناس متواصلين.. يا هو وهق عالم بهالسالفة.. تروح مكان عام ويجيك واحد حالف انه شايفك قبل هالمرة.. ومصر انه يتواصل معك لانه يبيك في موضوع مهم، وانت ما تعرفه ولا تدري وش الشي اللي ممكن يحتاجك فيه.. بتسوي نفسك مشغول ومستعجل.. وتقول له «عموما هذا كرتي».. مسوي لي فيها برستيج وعلى بالك يعني فكيت عمرك منه!
من بكرة يستلمك اتصالات ولا يخلي أي رقم من اللي مكتوبة في الكرت الا ويجربه، لا ويجيك من النوع القلق اللي لازم يسأل العالم كلها عنك، وتلاقيه يجرب يكلم من اكثر من رقم عشان يوصل لك بأي طريقة خصوصا انه متوقعك حافظ رقمه ومسميه «متى المعرفة».. ياعمي ماعندنا مشكلة مع ناس تتواصل باحترام وعندها شي محدد ومفيد، لكن في عالم تقدر الشوشرة على غير سنع، وما تدري ان الناس وراها اشغال وارتباطات وماهي فاضية تتكلم ساعتين يوميا في اشياء ما لها دخل فيها!
الحل لهالنوعيات بسيط جدا، صمم نص عدد كروتك بمعلومات اتصال غلط وخلها معك واذا قال لك ابو الشباب شايفك قبل هالمرة قل له وانا بعد شايفك، واذا قال ابيك قل له قدام، المهم عطه الكرت.. واستمتع فيه وهو ياخذه ويقول لك: «لاتكون من النوع اللي مايرد بس»!