كلام أول مرة ينقال!

فيه تاجر سعودي قال كلام أول مرة ينقال، يقول حنا يالتجار «مو انا هو اللي يقول» يقول حنا يالتجار لازم نصير زي تجار أمريكا ونتبرع بثلث قروشنا للأعمال الخيرية، أول مرة نسمع من تاجر كلام يبرد القلب، فيه ناس قالوا إن كلامه مهايط وإنه يبي يزبرق نفسه وإن ما فيه تاجر سعودي يقدر يسوي زي ما سوى بيل جيتس واخوياه اللي تبرعوا عدا ونقدا من رصيدهم بثلث ثروتهم، هالتاجر السعودي كتب اني استاذنت اهلي وابي اتبرع بثلث ثروتي بعد ما موت للاعمال الخيرية، فيه اعلامي انحرق قلبه من هالتصريح ودق التاجر بكم كلمة ووصفه انه «شحيح» وبلاش يهايط على حسابنا ماحنا ناقصين بهدلة وتعشيم، وقال له كانك صادق تبرع بثلث حلالك وانت حي، لأنك أصلا اذا مت كل قروشك راح تروح للورثة، ومع اني قلبا وقالبا ومقلوبا مع كلام الإعلامي، بس ماعليش، وش ورانا، اكل العنب حبة حبة، بعد سبعين سنة طلع تاجر يقول كلام يحسسنا ان قلبه معانا حتى لو كلامه زبرقه، بعد سبعين سنة جاية بإذن الله يطلع تاجر ثاني يقول كلام زي كذا ويكون قد كلامه، حنا حلالكم يا تجارنا، سوو اللي تبون فينا، اشوونا اقلونا، اكذبوا علينا، صرفونا بكم كلمة مزبرقة، لا يهمكم، نروح «سبايسي» لعيونكم، أهم شي أن قروشكم وكروشكم بخير!