عطلة «النوم»!

كل البشر في الكرة الأرضية لهم جدول منظم في حياتهم، طبعا أنا ما أعرف كل البشر في الكرة الأرضية واحد واحد بس أسوي زي حقين الصحافة لا بغوا يتفلسفون ويسوون حالهم يعرفون كل شي، وش ورانا؟ بدون ما تعرف يعني وانت مغمض تقدر تقول إن العرب يجون بعد بعض دول إفريقيا في التخلف الاجتماعي والمعرفي والمخي، تقول ليه كل البشر حياتهم منظمه وعارفين وش يسوون حتى بعد خمس سنين إلا حنا يالسعوديين، حياتنا تمشي على نظام زي ما جتبه غدتبه، مرات ننام مع صلاة الفجر ونروح الدوام وعيوننا كبر الفناجين حمراء ووارمة، وطول الدوام روسنا تومي وخدودنا متهدله من قل النوم، ولا رجعنا من النوم كبسناهم دجاج ورز ثم كوب لبن ثم طمرنا على السرير مثل ما يطمر السباح داخل الماء، وشخري لين أذان العشاء، تقعد من النوم ونفسك في طرف خشمك، ولا عندك استعداد ولا نفس تقضي لأهلك غرض، وألا تودي بزر للطبيب، مو مهم نستفيد من الوقت أهم شي عندنا كيف يمشي الوقت، قليل مننا اللي ينام بدري ويصحى بدري، عشان كذا لاجت العطلة ننحاس، حتى لو سوينا حالنا ناس هاي وسافرنا بالعطلة، نفس الجدول نسويه حتى لو كنا بجزر الكناري، سهر بالليل ونوم بالنهار، ما فيه إلا قليل جدا ما يجون خمس أشخاص من دولة كاملة منظم جدول عطلته، ومعاه جدول يمشي عليه، لو تسأل واحد: كم كتاب قريت بالعطلة؟ يحط يده على جبهتك يحسبك انهبلت!