حكم سعودي يا حسرة

بالبلدي الفصيح

دحين انا ابغى افهم انت فين رايح ؟ يعني بالله فين حكون رايح منتي شايفاني لابس بدلة التحكيم رايح احكم المباراة اللي باقي لها ساعتين وتبدأ وربنا يستر بعد المباراة حتسمعي من الكلام اللي يحبوو قلبك سب ولعن من الجماهير ومن غير الجماهير والسبب معروف الحكم ده مغفل ما حسب بلنتي رغم انه المدافع انبرش على المهاجم الحكم ده ما في راس اهله تحكيم اتسبب في هدف والمفروض يكون فاول، الحكم ده ما يفهم في الكورة ويا ريت يشتغل عسه بدل التحكيم حسب هدف واللاعب كان في موقف تسلل، عشان كده بقول يا ليت بعض الجماهير وبعض مسؤولي الأندية يتكلموا بالانصاف مو بالميول يا ريت يبتعدوا عن العاطفة شوية في انتقادهم للحكام يعني بالبلدي كده مو كل لاعب اتعنقل اعطيه بلنتي او احسب له فاول ومو كل لاعب بيكون ماشي على خط واحد مع المدافعين اعتبروا متسلل وانفرد بالباب وجاب قون، صدقوني ما بقول ده الكلام عشان أبرر للحكام، لكن اللي خلاني اقول الكلام ده لانه الحكم في الملعب وقريب من مجريات المباراة وشايف كل صغيرة وكبيرة في الملعب بس أحيانا سوء التقدير يوديهم في ستين داهية وتجي الطوبة في المعطوبة، وأنا عارف برضو انه الكلام ده ما حيعجب بعض من الحبايب اللي بالي بالكم واللي يعجبهم انه يكون التحكيم في صفهم مهما كان حتى لو لعبوا في بطولة الكيرم.
غلبان الحكم السعودي النقد دايما مسلط عليه من كل مكان، والحناجر ما تركتوا في حالة ليل ونهار وفوق كل ده الهجوم الكاسح والشرس واللي ما يرحم بياخد الملاليم على تحكيموا للمباريات تخيلوا 1500ريال على كل مباراة والله عالم كم بتكون مكافأة النهائي لكن لو جاء الحكم الأشقر وأبو عيون زرقاء أو خضراء بياخد 12000 ريال على المباراة هدا غير السكن والأكل والشرب عشان كده بتمنى من المسؤولين في الاتحاد السعودي لكرة القدم وعلى راسهم حبيبنا الاستاذ أحمد عيد أنه يشوف حل لحكاية مكافأة الحكام ويحاول قد ما يقدر انه يرفع من قيمتها عشان نطور رياضتنا ونطور حكامنا والا انتو ايش رايكم ياحبايب
هرجة «يا ريت يكون عندنا احتراف للحكم السعودي».
أستاذي ومعلمي عبدالله حامد العجمة لك محبتي وجزيل شكري وامتناني.
abofatoo@hotmail.com
للتواصل أرسل sms إلى 88548 الاتصالات ,636250 موبايلي, 737701 زين تبدأ بالرمز 150 مسافة ثم الرسالة