ربيع الحرف

القفة

تهاوشوا البزارين(1) وتزابوا(2) كلن يمدح سيارة ابوه ويقول انه ازين سياره ولا بوه(3) مثله بالعالم .. نويصر مهلقم(4) وصفط كل البزارين تحت ابطه وما غير هاجين اثامهم(5) ومبحلقين بوه من ذرابة لسانه وزين وصفه.
دحيم حمق(6) عشان انه ما يعرف يحكي مثل نويصر وهو معروف انه جلف ولا لفع الواحد كف تبدا الدنيا تدور به.. عجز يتحمل وما غير يتبلع ريقه ومير يقوم ويطحل(7) نويصر طحلة قويه خلته يصبخ(8) الجدار وينفلق راسه وتبدا الدمامين تصب من جبهته.. طاروا البزارين فزاعة لامه وقالوا له ان دحيم رنع(9) ولده وانشق راسه.. دخل نويصر يون ويشاهق ومير تجي امه تدك راسه قهوه عشان يندمل الجرح وتعصبه واثره بدخلة ابوه اللي ساله:
وش بهالولد اللي ما غير يمصر هالدمعه تقل مقطع منه لحم؟!
قالت امه: هذا دحيم عسى يديه للكسامير(10) متبلين الولد ولا يبيه يطلع راس يسولفون ومير يتحمى له ويعطيه طراق الين صك راسه الجدار!!
قال الابو: ساده(11).. اللي ما يجي الخشب ما يمخشه(12)!!
ومن هاك الحين وهو نايمن الخشب.. والعلامات الفارقة بالتابعية وبطاقات الاحوال فلقة بالراس .. كوية بالعلباة(13).. مخش بالوجه.. تجحيم بالعين.
هذاك طبعا زمان اول يوم الرجال رجال ويدارون ولا يطيرون بالعجة وتدبرهم الحريم وتوزهم وتحرش بينهم مهوب مثل هالحين اللي الواحد تاقف نفسه وينتفخ على ادناة الدون(14) ويمكن انه يدخل بالنوايا علشان يلقى علثة(15) للزعل.
رجال هالوقت يتهددون.. ورجال هاك الوقت يدارون.
***
(1) تهاوشوا البزارين: تضاربوا الأطفال (2) تزابوا: تفاخروا (3) ولا بوه: ولا يوجد (4) مهلقم: صاحب حجة (5) هاجين اثامهم: فاتحون أفواههم (6) حمق: غضب (7)يطحل: يضرب بقبضة اليد (8) يصبخ: يرتطم (9) رنع: ضرب بشدة (10) الكسامير: الكسور (11) ساده: صائبة (12) يمخشه: يجرحه (13) العلباة: مؤخرة الرقبة (14) ادناة الدون: أقل القليل (15) علثة: حجة.