null

جا في بالي اني ازور حارتي القديمة (الصحيفة) اللي اتولدت فيها وعشت فيها احلى ايام طفولتي وشبابي المهم وقفت السيارة في برحة سنبل ودقيتها كعابي اليين دخلت حارة الصحيفة وانا ماشي في شوارعها وازقتها القديمة قلت في نفسي يا الله هدا مسجد الحرمين اللي كنا نصلي فيه وهنا كان بيت عبدالرحمن خلاوي وهنا بيت عم حسن غراب وهنا بيت باسعيد وهنا بيت حسين العمودي وهنا بيت قمر الدين وهنا بيت عبده حلبة بضم الحاء وهنا بيت عم محمد باوزير وهنا بيت عمر باجبع ياسلااااام ايام كانت حلوه وجيران كانوا غاليين وعزيزيين على قلوبنا كنت تحس بقيمة الجار مو الزمن ده اللي تغيرت فيه القلوب حتى الجار ما يعرف جارو .. المهم وانا ماشي كعابي كانت العيون كلها عليا لاني صرت في نظر هادول الناس اللي ساكنين فيها كأني غريب داخل عليهم.. ناس من كل جنس ساكنين فيها اللي باقامه واللي من غير اقامه لانه اهل الحاره القدامى تركوها وهجوو منها .. المهم وانا بالفلف في الحاره تجي عيني على بقاله قديمه كان اسمها بقالة (باعمر) دخلت البقالة ولقيت العم عمر زي ماهوه بهيئتو اللي كنت اعرفه بيها وانا صغير وكان جالس وراء الطربيزه اللي محطوط عليها اللبان والحلويات وقراطيس القنبري والله يرحم ايام زمان لا كان عندنا قنبري ولا شيبس ماكان عندنا الا شرشوو وكربووه وحلاوة دنجووه ايام ما كانت قوارير المشن والاورنجينا والكندا دراي .. المهم لقيت عم عمر لابس الفوطه والفلينه ابو عسكري سلمت عليه وقولتلو ما عرفتني يا عم عمر رد عليا بلهجته الحلوه (هومن انته) . قلتلوا انا فتحي اللي كنت اشتري من عندك وانا عمري 12 سنة .. ضحك وقاللي طيب انت دحين كم عمرك ؟ سكت وقلت في قلبي شكلوا يبغى يفضحني .. المهم غيرت الهرجه وقلتلوا كيف حال اولادك؟ الاولاد الحمدلله طيبين خمسه منهم سعوديين ومتزوجين وكل واحد في عمله اللي في البنك واللي في الخطوط واللي في الكهرباء واللي في ارامكو واللي في التدريس وتلاته خلصوا ثانوية وجالسين في البيت لا شغله ولا دراسه لانهم مو سعوديين اخوانهم اخدو الجنسية وهما جاءهم النظام وحرمهم منها رغم انهم من مواليد المملكة وانا ليا عايش في البلد دي 60 سنه ولسه بيعاملوني كأني وافد لسه دوبو جي على البلد مالوو يومين .. طيب يا عم عمر ليش ما اخدت الجنسية زمان ؟ ياولدي كل شي نصيب ومقدر ومكتوب وما كنا نعرف انه الامور حتتغير وتصير بالشكل ده لكن الحمدلله على كل حال عايش على كفاله واحد من الاولاد وباقي الاولاد ما اخدوا الجنسيه رغم اني قدمتلهم وحاولت لكن مافي فايده وزي منت شايف ماهم قادرين يشتغلوا ولا هما قادرين يكملوا دراستهم لانهم مو سعوديين .. المهم تركت عم عمر ودمعتوو على خدوا وركبت سيارتي وانا ماشي قلت في نفسي اكيد في حالات كتيره في البلد زي حالة العم عمر واكيد في البلد الاولوف من المواليد اللي فتحوا عيونهم على هادي الارض اتولدوا في هادي البلاد وما يعرفوا غيرها.. حتى اوطان اباءهم مايعرفوها ولا حتى يفكروا انهم يروحوها لانهم بحكم المولد مو بحكم الدم بيعتبروا نفسهم مواطنين وانا متأكد من انه اباءهم يتمنوا انهم يعيشوا حياتهم كلها في هادي البلاد لانهم بكل تأكيد ارتبطوا ارتباط كبير بهادي البلاد لانهم حسوا بالامان والاستقرار وشافوا كيف صار اولادهم متعلقين بهادي البلاد واهلها لانهم ولدوا هنا واتربوا هنا ودرسوا هنا وصار ولاءهم وانتمائهم كبير وعميق لهادي البلاد واهلها حتى لما تجلس مع اولادهم وتتحسس مشاعرهم ما تحس بفارق لانه كلامهم وطبايعهم وعاداتهم وتقاليدهم زينا بالزبط عشان كده يتمنوا من كل قلوبهم انهم يكتسبوا الهوية الوطنيه او انه يكون لهم وضع وتعامل خاص غير التعامل اللي بيكون لوافد لسه دوبوا قبل يومين دخل البلد رجاء ارفعه لاصحاب القرار انهم يشوفوا حل لهادي الفئه الغالية والعزيزه على قلوبنا واللي عايشه معانا من سنوات طويله انه يكون لهم تعامل ووضع خاص في هادي البلاد العزيزة على قلوبهم ووجدانهم وعيشوا كتيييير تشوفوا كتيييير.
abofatoo@hotmail.com
للتواصل ارسل رسالة نصية sms إلى الرقم 88548 الاتصالات أو الرقم 636250 موبايلي أو الرقم 737701 زين تبدأ بالرمز 150 مسافة ثم الرسالة