30 يوماً لمحاسبة النفس

حديث المجالس مركاز يرفض طغيان المسلسلات

كان شيخا طاعنا في السن يتحدث وهو يجهش بالبكاء، عن رمضان وكيف نستقبله، وهل أعطيناه حقه كما ينبغي في السنوات الماضية.
كان حديثا شيقا عن رمضان بين الأمس واليوم، كيف كان يستقبل، وكيف يودع، وما أصبح عليه الناس.
الشيخ الذي كان يتحدث عبر قناة فضائية لفت إليه أنظار أحمد «أبو خالد» وأصدقاءه علي العمري وحسن البدراني وصالح العمري في مركاز في جدة، فالتفوا حول التلفاز يتابعون بتركيز حديث الشيخ، وبعد انتهاء البرنامج هتفوا وبصوت واحد «والله معاه حق» في قناعة تامة منهم بأن الحديث لامس واقعا معاشا لا يستطيع أحد إنكاره.
محاسبة النفس
علي: بصراحة كلامه صحيح وفي محله.
حسن: شفت كيف كانت طريقته في الكلام تخلي من يسمع كلامه يراجع حساباته.
صالح: بصراحة إحنا مقصرين ولازم ننتبه لأنفسنا وبعدين كم رمضان في السنة، أكيد ما يجي إلا مرة وحدة، ويمكن يجي اللي بعده ما ندري نعيش ولا نموت يعني لازم نخلي لعب «البلوت» وضياع الوقت لبعد رمضان لأنه شهر عباده.
أبو خالد: تعالوا نحاسب أنفسنا شويه ونشوف إيش سوينا في رمضان السنوات الماضية، أنا أشوف أنه ما سوينا شي غير الصوم والصلاة والتراويح وأحيانا ما نكمل صلاة التراويح.
حسن: إحنا أحسن من غيرنا، أقل شي نصلي التراويح حتى لو ما هي كاملة.
علي: ومالنا ومال غيرنا ليش ما نشوف اللي يصليها كاملة، ونخليه قدوة لنا، وأنا عن نفسي أكثر الأيام في رمضان أصلي التراويح حتى نهايتها.
أسواق واستراحات
صالح: خلونا نتكلم بصراحة رمضان اختلف كثيرا عن أيام زمان و..
يقاطعه أبو خالد قائلا: لا وأنت الصادق، الناس اللي يتغيرون، ولكن رمضان ما يتغير.
صالح: وأنا هذا اللي أقصده بالضبط.
حسن: كيف يعني؟!
صالح: يعني تشوف الناس في الصباح صايمه، وفي الليل تتجهه إلى الأسواق والمراكز التجارية، ما همها إلا ملابس العيد والأسواق.
علي: بالفعل الأسواق مليانه، وبعض الناس ما همهم إلا استقبال العيد وينسون رمضان وكسب الأجر في الشهر الفضيل.
أبو خالد: طيب هذا الشيء يخص العوائل، لكن بعض الشباب ايش وراهم، دجتهم في الشوارع تبدأ من بعد صلاة العشاء، وبعضهم ما يصلي التراويح وتلقاهم بس يلفلفون في الشوارع وما وراهم لا شغل ولا مشغله، وبعضهم يتجمعون في المقاهي والاستراحات، ما في إلا «بلوت» وسوالف ما لها داعي.
حسن: بصراحة حرام اللي قاعدين نشوفه رمضان صار كله للأسواق والاستراحات، والا متابعة المسلسلات اللي ما تنتهي أبدا.
صالح: اللوم على بعض القنوات الفضائية اللي تتسابق في رمضان على بث المسلسلات، وتصدقون في قنوات تبدأ برامجها بعد أذان المغرب مباشرة، يعني والناس تصلي ما عندها صبر تستنى بعد الصلاة.
برامج ومسلسلات
علي: اللي يزيد الطين بله على قولتهم أنه في ناس تفضل متابعة البرامج والمسلسلات هذي اللي تقول عنها تجي وقت صلاة المغرب على الصلاة، وما يروحوا يصلوا في المسجدعشان يتابعونها من البداية وما يفوت عليهم شي.
حسن: يعني المسلسلات صارت هي الغاية لدى البعض في رمضان.
صالح: والمصيبة هناك بعض الناس ينسون زيارة أقاربهم وصلة الأرحام في هذا الشهر الكريم.
علي: تخيلوا في واحد من الأصدقاء يرسل لأقاربه رسالة بالجوال يبارك لهم برمضان، وما كلف نفسه يروح لعندهم ويبارك لهم بالشهر، وفي ناس كثير بهذي الطريقة.
حسن: لازم كل واحد فينا يراجع نفسه، ولازم نستغل هذا الشهر الكريم.
صالح: اللي راح راح خلونا في اللي جاي، وزي ما قال حسن خلونا نستغل هذا الشهر من بدايته.
أبو خالد: إيش رايكم نتقابل كل ليلة وقت صلاة العشاء في المسجد، نصلي العشاء والتراويح وبعدها كل واحد يرجع لبيته ونتقابل بعدها بساعة.
علي: هذا حل رائع بدل ما نطلع من بدري منها نشجع بعض، ووقتنا يروح في شي كله خير.
حسن: هذا الشيء اللي المفروض نسويه من بدري، وإذا كان على جلسات البلوت ملحوقه المهم نستغل الشهر الفضيل قد ما نقدر.
صالح: أتمنى أن الكثير من الشباب سمعوا حديث الشيخ اليوم وهو يتكلم عن رمضان.
حسن: الله يسمع منك بصراحة كلامه مؤثر ومقنع، وبالفعل أتمنى أن كثيرا من الناس شافوا هذا البرامج واستفادوا منه بدل المسلسلات والبرامج التافهه.