سلسال العسل

خبروا (ميل) الكحل عن رمش عينه
وعلموه انه بلياه اكتحل
وانشدوا ذاك الشفق عن شفتينه
هو صحيح انه من شفاته ثمل؟؟
وأسألوا دمٍ (يبش) بوجنتينه
عن خدودٍ يشتكي منها الخجل
كل ما ازجى: ضحكةٍ مع ياسمينه
يلعب المرمر (بسلسال العسل)
النسايم ما تهب الا لعينه
والنفل لولاه ما سمي نفل
تنتصف كل الشهور أعلى جبينه
وكل بدرٍ للدجى غاب وأفل
وللحرير حكايةٍ بين اصبعينه
تبتدي لاظلّم جديله وانسدل
المرايا تستحي توصيف زينه
ينكسر خاطر صورها لاوصل
أشهد ان البرد ما صافح يمينه
يوم صافحت الدفا بردي جفل
ان حكى له نبرةٍ ما هي حزينه
تتجه بالروح لديار الامل
به دلال، ودللوه مدللينه
يبتسم بين الهدب بنت وطفل
ان زعل تزعل علي أحلى سنينه
وان رضى يزعل علي كل الزعل
إيه احبه وازعلوا يا حاسدينه
وإيه لا شفته بلا حفل احتفل
ل..اتبعه لو للوهم موج وسفينه
ان حصل لاماه والا ما حصل
لايمي جعل العمى يمسي بعينه
وسط عينه لا يميل ولا يزل