قصيدة (ياشيب عيني من هروج الملاقيف )

يانفس وقتي مايجي لي على الكيف
بس اصبري والوقت حكمه ايطاعي
المجتمع معروف من غير تعريف
غيبه وخيبه وانحدار وضياعي
ياشيب عيني من هروج الملاقيف
اللي سوالفهم تجيب الصداعي
ماعندهم غير النميمه سواليف
يتناهشون العُرض مثل الافاعي
لكن أنا لا اوحيت يانفس ما اعيف
الله جعل فج الفيافي وساعي
لاطال صوت مصنّف الهرج تصنيف
دفعه على بعض السوالف رباعي
اسجّ رجلي مع هبوب النفانيف
واختار عن هرج النزول ارتفاعي
سجّ القدم مع راحة البال لي ريف
أحسن من الغيبه وبعض النزاعي
ياحيف ياقروم الرجاجيل ياحيف
ماينبذون اهل العقول الوجاعي
هرجٍ يجرّف عُرض الاجواد تجريف
ماكان له عند الرجال استماعي
ياسامعين القول مامنه تكليف
بلاش لو كان النصايح تباعي
هاذي رساله ماحوتها المظاريف
يصغي لها من كان له قلب واعي
يامنتّف اعراض المخاليق تنتيف
عيبٍ على الرجال بعض المساعي
تسحق حسانيك الذنوب العواصيف
وتشيل عنهم حمل مايستطاعي
أن شفت خلة واحدٍ مابعد شيف
بينك وبينه تنصحه بالوقاعي
اعلم ترى بعض النصايح معاريف
يصغي لها خطو الرفيف الشجاعي
واليا تفرقتوا من الأقشر امعيف
مال السوالف فيه للناس داعي
مهما تزخرف هرجتك بالزخاريف
الهرج مايملئ البطون الجياعي
كم هرجةٍ ترمي بها فالشراشيف
من كثر خلطك للكلام الصناعي
الصمت حكمه والسوالف مراديف
والناس من بعض السوالف اشباعي
واليا هرجت أهرج بهرج العواريف
هرجه لها عند النشاما شعاعي
قد السفينه لاتحادى على السيف
عكس اتجاه الموج شدّ الشراعي
وصلاة ربي ماتلوح الرفاريف
على الذي تمّم بحج الوداعي