مجاراة الشاعر : العقيد عمار القليبي الشمري لمرثية خالد التويجري بالملك عبدالله

مجاراة جميلة وشاعر متمكن يجيد صياغة الحرف بأسلوب ممتع . له أسلوب رائع في سرد المجاراة
الشاعر العقيد / عمار القليبي الشمري اتجه بهذه المجاراة إلى مدح وإعجاب في قصيدة رئيس الديوان السابق خالد التويجري في رثاء الملك عبدالله رحمه الله.
( الي فقدته فقيده للوطن كله
يبكيه ماحدر من الجال للجالي )
يالي تسوق المعاني سوق وتدله
في محله تجيك خفاف وثقالي
الي قراء شعرك المحبوك مامله
متمكنٍ بالشعر وأبياته جزالي
بيحت سد المعاني دقه وجله
من عادة المرتهي حباله طوالي
كل نقطة تسوقه سوق لمحله
والخيل ما يركبه ياغير خيالي
اهديت من سلتك ما يبري العلة
نسمة هواها يجي له نفح وظلالي
مثل السحابه اليامن جتك مهتله
صوت الرعد في يمينه تقل زلزالي
سيلت وديانها والارض مبتله
ما ينزله كل طرقيٍ ونزالي
تفتل بيوت القصايد شوق وتفله
مشاعر الغالي اليا غاب له غالي
تسلم يمين الي دلال الشّعر زله
وحنا نتحساه مع تمره وفنجالي
زهبتها في رخى تطبخ على ملة
وصبيت فنجالها الي تقل شلالي
وذكرتنا بالوداع الي على حله
وحنا عرب بالعواطف ما لنا تالي
صدق المشاعر توقَّد لمعة السلة
ياسهل ياممتنع ياعذب يازلالي
ياحلو يامر ياحامض على الشله
متى بغيت المعاني جتك زرفالي
الي فقدته فقيده للوطن كله
يبكيه ماحدر من الجال للجالي
بكاه سلمان مقدمنا الياكله
وخوان الأنور بكوا ماضين الأفعالي
ولا لوم عينٍ بكت في موت عبدالله
بكاه شعبه من الاول الى التالي
والعين لابد تبكي يا فقدت خله
وبعض الغلا يا تمكن صار سلالي
بكيت وانته معه دايم تحت ظله
وحنا بعيدٍ بكينا عبر الإرسالي
ندري انك معه وافي وامين له
ولولا الوفاء مارقيت المرقب العالي
في حضرته تكسر الفنجال والدله
وتستاهل محبته يا طيب الفالي
واسجلّك الي تبنيته من اسجلّه
ونهلت من غبته يا مزبن الجالي
وانته من الي وفاهم طبع وجبله
اخلصت في طاعته في كل الاحوالي
والدنيا مهما صفت لابد له زله
والحي لابد يذوق المر والحالي
خذ العبر بالحوادث تشفي الغله
في كل دورٍ يجي ياتي له رجالي
لاتشتكي من سمار الوقت والقلة
دام البقاء للزمن والناس عمالي
رقيت راس النباء وارقبت المطله
لا والله الا مهي حالك مثل حالي
مجدٍ بنيته بقاء في راس له تله
ياليت بعض الذي جالك تهيالي
ليا صفالك زمانك عل واحتله
وليا تغير يحله الف حلالي
لياقبلت فلها وان أدبرت خله
يالي خذيت القناعة راس للمالي
سلام يالي عزيز الدمع ما ذله
ماقصدي الا سلام. اقفاي واقبالي..