لآلئ شعرية

لا جيت ابنسى هاجس القلب ساعه
يطري علي من الهواجيس ما ضاع
يا ليت من قلبه على الكيف طاعه
ما هو بمثلي عاصي ٍ لي ولا طاع
لو يستمع لي لا نصحت استماعه
لاهل الهوى والغي ما هو بملتاع
آدم ونسله ما تغيّر طباعه
مسيّر ما هو مخيّر بالاوضاع
ياكاملِِ بالوصف وش ذا القطاعه
الهقوة انك يا اريّش العين خداع
قدرت توقعني بشرك الخداعه
لا شك ما تقدر تغيّر بالاطباع
غرك جمالك واحترفت الطماعه
عرفت نوع وتجهلك بعض الانواع
حتى الحديد اللي قوي المناعه
تحت اللهب يا عاشق النفس ينماع
من شاف نفسه نايفِِ بالجماعه
قل احترامه لا تكبر بلا داع
كالطير في حومه وزود ارتفاعه
يصغر بعين اللي يراعيه في القاع
ولا من تعكر جو سبع السباعه
يرضى بمقسومه ويصبر الى جاع
ما الجوع يوزي به لدرب الدناعه
فعل وحماس وعزة النفس وذراع
عندك خبر ما هو بسمعِِ وطاعه
متبوع في رايي ولاني بتباع