أصعب ألم

بيني وبينك لو تطول المسافات
كلمة وفا متجدّدة بين الأحباب
أنت الذي دون المخاليق بالذات
لو غاب عن عيني عن البال ما غاب
ذقت بغيابك عنّي طعم المعاناة
قلبي أنا من طعن الأيام ما طاب
عاش الألم والحزن فيني والآهات
من عقبها ظني أنا بالزمن خاب
ضاعت معه أحلى الليالي والأوقات
ما للأمل مفتاح وما للأمل باب
خايف أعيش الحلم وألقى الأمل مات
ولا الأمل يذبل وبيديني أسباب
أصعب ألم إذا تحمّلت بسكات
هذا الألم وأنت من الوقت منصاب
كنّي بدونك عايش بحالة إسبات
هذا جليد البعد للحين ما ذاب
يا وقتي ما يكفيك كل الذي فات
تضحك بوجهي وأنت في مبسمك ناب
يا وقتي اضحك لي وهات الأمل هات
قلبي من الآمال للحين ما تاب
صوتي معاناة القلم ضمن الأبيات
نبضي خليط من الأحاسيس بكتاب
شفت الغموض اللي تجسّد بلوحات
شفت الدموع اللي ضحكت وسط الأهداب
هذا أنا عشت الهنا شويّه فتات
واقف وأنا اللي شاب قلبه وهو شاب
سبحان من زيّن بديع السماوات
لله ما ياخذ ولله ما جاب