لقاء خاص وحصري عبر صحيفة التميز الالكترونية مع رئيسة المصممات السعوديات في غرفة جدة

ضيفتنا الليلة سيدة الأعمال ومصممة الأزياء السعودية الاستاذه أميمه عزوز ..أول سيدة سعودية تشارك في مهرجان الجنادرية بتصميم ملابس الفنانين ..بالعزيمه والإصرار والطموح وصلت للنجاح والإبداع في مجال تصميم الازياء :
كل عام وانتي بخير ومبارك عليكي الشهر ؟
وعلينا وعليك يارب وعلى المسلمين جميعا .

من هي أميمة عزوز ؟
أميمه عزوز خريجة بكالوريوس فنون اسلاميه من جامعة الملك عبدالعزيز بجدة ثم التحقت دراسة الماستر في لندن في الأزياء وأخذت كورسات في سويسرا للأزياء واشتغلت في البدايه مع مجموعه اول ثلاث وأربع سنوات وبعد ذلك استغليت بحياتي وشغلي الخاص كمحل بوتيك ازياء خاص بي .
تصميم الازياء هل كان عن طريق الهوايه أو الموهبة أو دراسه ؟
موهبه منذ الصغر وهواية ثم اصقل بالدراسة والاستمراريه والخبره وهذا اللي ميزني انه دراسه وموهبه .

من وراء هذا النجاح والإبداع والتألق ؟
أول شيء التوفيق من الله سبحانه وتعالى وبعد ذلك الإصرار على النجاح لأنه كان الاهل ماكانوا يطمحوا اني أكون مصممة أزياء كانوا يطمحوا اني أكون دكتوره وانا كل البعد عن هذه المهنه مع أنها مهنه رائعه ومهنه انسانيه ..انا أهوى الفن والجمال فحبيت مهنة التصميم ودخلت الفنون الإسلامية وماكان كثير مقتنعين ويفكروا انه شيء بسيط وسهل بس من حبي انا وبالموهبه والإصرار وكملت الدراسة الجامعيه وانا متزوجه وساعدني صراحة زوجي وبعد ذلك أولادي ولمن فتحت مشروعي ساعدوني بناتي صاروا من حواليني يجلسوا معي ويعطوني أفكار ..وكلهن نفس الشيء موهوبات ماشاءالله.

السيده أميمه عزوز اول سيدة سعودية تشارك في مهرجان الجنادرية كمصممة لملابس الفنانين ..كيف وجدتي صدى تلك التجربة ؟
تجربة رائعه جدا وانا لي فخر اني اشارك في محفل وطني يقام كل سنه في السعوديه كان شيء عاجل ..كلمني الأمير متعب وحب يشوف شيء مختلف ونخرج عن المألوف فخلال ستة أيام تم ذلك والحمد لله وفقت إلى حد معقول .

نلاحظ نجاح المصممين الرجال في تصميم الازياء النسائية ..هل فكرت السيدة اميمه في خوض تجربة التصميم للملابس الرجاليه بعد النجاح في تصميم ملابس الفنانين في مهرجان الجنادرية ؟ بالعكس بفكر فيها من فترة طويلة بس ما أحب أخوض التجربة قبل الدراسه من جميع النواحي ولاتنسى أن المرأة وأطفالها صغار لغاية مايكبروا ..الأم هي اللي تختار ملابسهم فهي فنانه حتى في تلبيس الرجل فهي فعلا قادره على التصميم للرجل طالما موجود الذوق.

في نظرك هل المرأة مع تقدم مراحل العمر تختلف نظرتها واهتمامها بالازياء ؟
في الاول والآخر اعتبره ستايل سواءا انا صغيره أو كبيره كل وحده لها ستايل وكل مصمم له ستايل ..فيه مصممين يعتمدوا على الكلاسيك مره حتى من بداية الصغر وهذا الشيء لاحظته في بنتي وهي صغيره وهي تحب الأشياء الكلاسيك الرسمي وفيه ناس كبار يعتمدوا على الصرعات والسن له تأثير وكل مالانسان نضج كل مايحس كيف اقدر أبرز جمال اللي الملابس بأبسط القصات والألوان الهادئه حتى أبرز جمال الإنسان وانا من الناس اللي اعتمد على القصات الكلاسيكيه والناعمه جدا اللي تبرز الإنسان اللي يرتديه ويعتمد على حسب العميله اللي أتعامل معها قبل مااصمم لها الفستان وذوقها .

العباية تضيف للمرأة جمال وشموخ ماهو اهتمامك بتصميم العبايات ؟
العباية من أهم واحلى واحب التصميمات عندي وكثير يقولوا تصميم العباية يأخر وصول المصمم للعالميه. .وأنا أقولهم بالعكس كبار المصممين الاوروبيين للعبايات صمموا العباية الخليجيه فبالاحرى احنا هذه بصمتنا العباية والثوب ويكون أولى اهتمامنا .. العباية تعطي للمرأة شموخ وكبرياء وقوة وصفه خاصه انها مميزة ..في الغرب انا لي تجربه لمن امشي ببنطلون وجاكيت النظرة لي عاديه ولكن لمن امشي بالعبايه ملفته الكل يبغى يشوف الجمال واتمنى من المصممين أن لايبتعدوا عن تصميم العباية والثوب.

هل واجهتك صعوبات في مجال تصميم الازياء ؟
كثير .. أول صعوبه واجهتني انه لايعتمد ..إنه لايعترف بإسم مصمم أو مصممة في مجتمعنا وعدم تقبل الاهل لمهنة المصممه. .هذا فن ولانستغني عن الملابس وهل فيه أحد مايلبس السوق كله بضاعه اوروبيه اجنبيه هل البس على ذوقهم حتى هم لايعرفون عاداتنا وتقاليدنا. .لمن تجي مصممه عربيه أو خليجيه وسعوديه خاصه بتعرف طبيعة المرأة هنا وطبيعة جسمها فهي بالأحرى انها تكون مصممة سعوديه تصمم ..وأيضا صعوبة تواجد مكان للعرض.

أستاذه اميمه سبق وأن أقمتي عروض في عدد من الدول ..كم عددها وأين أقيمت ؟
في دول الخليج كلها تقريبا عدا الكويت لسه وجائتني عروض لعمل عرض في الكويت لكن الفرصه والظروف ماسمحت لي ..عمان مسقط ..البحرين..الإمارات. .قطر..أبو ظبي ..السعوديه في جده والرياض والخارجي عرض في المغرب ولندن وباريس وقريب عندي معرض في باريس ثاني .

ماهي نصيحتك للمصممات المبتدئات ؟
نصيحتي انه يصروا على اللي انتم تحبوه وعلى النجاح اللي تسعون له واحنا معاكم احنا فعلا تعديلا شوط كبير في الأزياء وحنكون واقفين معاكم وبعد تكوين لجنة تصميم الازياء في الغرفة التجارية ولله الحمد فكرتها جات على إيدي هذا أكبر نجاح ودعم للبنات.
أستاذه أميمه كفتاه سعوديه نفخر فيك خضتي تجربة التقديم في البرامج الحوارية التلفزيونيه في البرنامج الناجح والمتابع جداويات كيف وجدتي التجربة ؟ أنا لا اعتبر نفسي مذيعه في هذا البرنامج انا ماأحب أكون في شيء انا ما أحس نفسي فيه مذيعه .. ممكن أكون قائدة لمجموعه بس مذيعه لها شروطها ولها إمكانياتها انا أعتبر نفسي مصممه وفنانه وسيدة مجتمع ورائده في مجالي ..فكرة البرنامج عرضوا علي بحكم تواجدي في الغرفة التجاريه قلت ماأقدر أكون مذيعه فقالوا انتم السيدات تعرضوا قضايا ومشاكل اجتماعيه كحوار وتناقشوها وفي نفس الوقت تعرضها على الرأي العام بنستضيف ضيوف في نفس التخصص ونناقش معهم الحوار وممكن يخطر في أذهان البعض اني مذيعه وانتي مصممه ولا يمنع اني أخوض كذا مجال واتعرف عليه واكون عضو فعال في أي مجال.

ذكريات عن شهر رمضان ؟
كله رائع كنا نحس في رمضان. .قبله بشهر نستعد للشهر الفضيل ..كانت الوالده تنزل تجيب أشياء رمضان السفره وش نحط فيها اطباق والوان والشراشف وش يتغير فيها شكل والوالد الله يرحمه كان يحضر المصاحف ..قريب المغرب نجتمع نشوف برامج التلفزيون ونشوف الشيخ علي الطنطاوي الله يرحمه كان لها وقع .. يختلف رمضان في الماضي عن الآن كنا في رمضان نشوف الاهل أكثر اجتمع بجدتي وخالاتي وعماتي. .سفره كامله الآن اختلف مانقول الزمن لأن الزمن واحد ولكن الإنسان والفضائيات ومشاغل الدنيا كيف تأثر في هذا الإنسان هذا واحنا تربينا تربية قويه فكيف الجيل القادم لو مااحنا وبناتنا اللي بعدنا عرفوا كيف يمسكوا زمام الأمور الأمور حنضيع وانا مبسوطه جدا بموضوع بمهرجان في المنطقه التاريخيه بالبلد كثير رجعت الناس انها تعرف تاريخ ماضيها حتى فيه أشياء انا ماشفتها ولازم نتمسك بتراثنا بأصالتنا لأن اللي ماله تاريخ وماضي اصلا ماله حاضر وماله كيان .

هل تتذكرين طفولتك مع الصيام ؟
أول كنا نصوم قدام الاهل ومن وراهم نشرب مويه والآن احنا تربينا وصرنا نعرف أولادنا كيف تفكيرهم وكان رمضان حلو زمان من كل النواحي.

ماهو برنامجك اليومي في رمضان ؟
أنا ماأعرف انام في النهار الوقت صار عندي ضغط حتى ماصار عندي وقت أدخل المطبخ وأولادي يقولوا ياماما أكلك أحلى بكثير متى ترجعي تدخلي المطبخ لكن كل فتره أدخل المطبخ أعلم الشغاله الطبخ .

شخصية تحرصين على الإفطار معها ؟
بصراحة أولادي انا حريصه على الإفطار معهم .

وجبتك المفضله على الإفطار ؟
شوربة وسمبوسك ولازم مقلي مو في الفرن ..والفول طبعا والدقه حقت زمان اللي كل سنه أمي الله يخليها لنا تسويها لنا .

والدك الله يرحمه ووالدتك ربي يحفظها لهما دور كبير في حياتك فماذا تعلمتي منهما ؟
طبعا تعلمت من الوالد الله يرحمه الكثير والكثير أول شيء زرع فينا الأخلاق الحميدة كيف انك تكون مع الجميع انسان متواضع وانا أتذكر من يوم انا صغيره كنا نأكل مع الشغالات في سفره واحده وكان ابوي الله يرحمه يتعامل مع السواق ياابني وتعلمت من امي الهمه والنشاط كانت مره شديده كانت تقول لازم تدخلوا المطبخ عشان تطبخوا لرجالكم وتعلمت من امي النظافة الزايده والنظام ولمة الاهل عادات كثيره تعلمتها من امي ربي يحفظها.

كلمة لقراء صحيفة التميز ولمحبينك ومتابعينك ؟
اشكرك انت شخصيا أستاذ سعيد على حرصك على عمل لقاءات مع أشخاص خاضوا تجارب كثيره في مجال عملهم وتخصصهم وبالذات في الشهر الكريم فعلا يعتبر شيء رائع جدا اهتمامكم بقضايا معينه ويعطيكم ألف عافيه واشكر صحيفتكم .