المطيري:حلقة تعدد الزوجات «بايخة».. وليتني ماشفتها

شاهد عيان من الشارع العام، على الأعمال الرمضانية ونجومها.. له وجهة نظره تجاه ما تابع من الأعمال وله رأيه الخاص بالطبع..
وش تتابع؟
أكيد طاش ماطاش بس لأنه ما عندي وقت.
ما تابعت مسلسل سكتم بكتم؟
ودي بس للأسف وقته مع طاش ماطاش ويبغى لي تليفزيونين عشان أقدر أشوفهم مع بعض
مين الفنان اللي تحس أنه قنبلة في الوقت هذا؟
ما زال ناصر القصبي المتصدر ويجي بعده فايز المالكي وعبدالعزيز الفريحي وعوض عبدالله
وش اللي تحبه في القناة الأولى واللي فقدته؟
أحب البرامج الدينية واللي فقدته انسحاب طاش ما طاش إلى الإم بي سي
مين اللي تعتبره ثقيل دم ولا ينبلع؟
شلة مسلسل «بيني وبينك» وحاولت إني أتابعه ما قدرت.
مين الممثل اللي تحس فيه جرأة وليش؟
محمد العيسى فيه جرأة بس خايف يجيب العيد.
وش الحلقة اللي تابعتها اليوم؟
تابعت طاش ماطاش حقت الحريم اللي تتزوج أربعة رجال وحسيت أنها بايخة ليتني ما تابعتها والظاهر مسربينها عشان يبغونا نشوفها.
لو أحد قال لك أكتب لنا حلقة وش بيكون مضمونها؟
أبي أكتب عن إغلاق المحال بعد الساعة ال 12 ليلا وكيف أنا نضرب مشاوير لخط الدمام عشان بقاله
تتوقع الشباب وش يحبون يتابعون في رمضان؟
أي شي كوميدي بس غيرها ما أتوقع يهتمون.
هل تؤيد الأعمال التراجيدية اللي تعرض في شاشات التليفزيون وهل لها فائدة؟
أكيد لأنها تحاكي واقع مجتمعنا ولكن البعض هداه الله تعدى الخطوط الحمراء.
مين تقصد؟
صدقني هو عارف نفسه والناس عارفينه.
تابعت سباق المشاهدين؟
الأعوام اللي طافت كنت أتابعها بس رمضان هذا ما تابعت ولا حلقة ولا أخفي إعجابي بحامد الغامدي.
من أفضل مخرج عندك؟
والله إحنا ما نعرف المخرجين نعرف نتابع بس الممثلين وغير كذا ما أعرف أحد
طيب لو طلب منك تمثل هل تقبل الموضوع بصدر رحب؟
مستحيل لأن عندنا عيب نطلع قدام العالم نهرج ونضحك إحنا حدنا نشوف وكثيرة بعد علينا.