عمري انتهى بجرحي وعطبي

قدر الله وانكتب لي هالنصيب
ما بيديني شي وهذا امر ربي
من عرفته ماتمنيته حبيب
ولا تمنيته يصير بيوم قربي
كل ما شوفه احس انه غريب
وانكر وجوده ليا من صار جنبي
من شروق الصبح لي حتى المغيب
ودمعتي في محجر عيوني تصبي
ابتسم للناس وآمالي تخيب
وفي خفوقي نار حسرات تشبي
احتضر كني عن الدنيا بغيب
كن عمري انتهى بجرحي وعطبي
وليلة تشكي المها واللهيب
لا يواسيها قمر ولا نجم قطبي
وصرخة محدن سمعها ولا مجيب
تقطع انفاس الفجر وتعود صوبي
وغربة في النفس وشعور مريب
لا هدالي بال ولا سايرت دربي
والزمن اصبح من احزاني كئيب
وابتدى يظهر علي آثار خطبي
كل من حولي سمع صوت النحيب
وشاف في وجهي من الآلام ندبي
جاني بحيره ويطلبني اجيب
والمصيبة لو حكيت اشعلت حربي
جيت ابصبر وعيت جروحي تطيب
وما قدرت اخفي انيني او اخبي
وجيت ابسكت والسكوت امر صعيب
قلت انا ماابقى معاك بدون ذنبي
ادمعت عينه وقال امر عجيب
كيف ترضين بعذابي وليه سلبي
ان رحلتي موتي بيصبح قريب
مااحتمل ابقى وانا منزوع قلبي
قلت انا ما بيك في عمري حبيب
والحقيقة انجبرت وكان غصبي
والمحبة من طرف واحد تخيب
ما اقبله حب وانا مذبوح قلبي
وزلزلت من تحتنا ارض غضيب
وعصفت فينا الرياح شرق وغربي
والتئم جرحي بعد وقت عصيب
وانتهت رحلة عذابي ويوم صلبي
ديما الدوسري