بيت وصدى

كان بيت الأسبوع الماضي للشاعر حمد عبدالله الوايلي من حوطة سدير حول ظاهرة انتشرت بشكل ملفت للانظار وهي ظاهرة التسول والاساليب الجديدة له وخطورة العصابات التي تدير هؤلاء المتسولين ويقول:
ياناس شفنا للتسول اساليب
مدري عن الصادق ومدري عن اللي
وكان صدى البيت من الشعراء
احد(ن) تمهن للحيل والأكاذيب
مستانس بالمكر دربه مولي
يوهم عباد الله مبعد عن الطيب
لو هو غني ممشاه من فوق زلي
عايش ممثل مايهم عنده العيب
ياكيف يكذب من يصوم ويصلي!
عبدالكريم ابن خزيم - البكيرية
نبي ان تصدق واليالي مشاهيب
ياليتها في يد صايم مصلي
كنه يقول ياذيب ياذيب ياذيب
هل الدموع وداخل القلب هلي
رحب بزرق (ن) ثم زيد التراحيب
اطيب شعب للاجنبي والمحلي
فلاح بن مطر الحربي - القريات
الناس فيهم مخطي الدرب ومصيب
واشوف من هالنوع لارحت اصلي
يحسب جميع المال كله مكاسيب
يالوايلي ياعل مثله يولي
عساه يم قريح في مجحرة ذيب
لاهوب خوين لي ولاصاحبن لي
شجعان بن سعود المقاطي - الرياض
ترى الفخر ماهو بكثر المطاليب
تاج الفخر والعز باللي يصلي
بعض الظواهر حلها اليوم ترتيب
مثل التسول صار وسط المحلي
لابد يدرس ثم يدرس بتعقيب
كم واحد محتاج لاشك ملي
عبدالمحسن المحيسن - رياض الخبراء
يا الوايلي مشكور يامنبع الطيب
مافيه داعي بس قلي وقلي
ناسن تسول بس ماتفهم العيب
عند المساجد يزعجون المصلي
يالله عساهم خاسرين المكاسيب
لاتقول مالي دخل خله يولي
أزهم على المسؤول بأمر المعازيب
هو بتصالك واجب انه يهلي
سعد صنهات السهلي - الدرعية
يا كثر مايحصل من الشك والريب
دام التسول صاحبه مايذلي
تنوعت اشكالهم كذب ومصيب
والناس ماتدري حرام وحلي
ترا التعاون بيننا زين ويجيب
احلى النتايج كل دق وجلي
علي الرشيد - رياض الخبراء
ضاع الضعيف وصار وصله لنا صعيب
وين الذي محتاج من هو يدلّي"
"عند الاشارة لابسين جلاليب
حول الخطر ماشفت أحدٍ يذلّي
" احدٍ مجبّر ثم يطمر بلا عيب
البعض ياعالم عصابة تشلي"
عثمان ابراهيم الرشيد - الرياض
ذي عادة واليوم لا بد تأديب
أسلوبهم سيئ وفعله يعلي
في دارنا ما نقبله كم به العيب
صاروا خراب الدار بأرض تحلي
واللي تخادعنا ببيع اللعابيب
وين الرقابة لازمن له تشلي
محمد عبدالعزيز الخنيفر- اشيقر
كشف التسول من اهم المطاليب
امره تفشى زاد صار امتجلي
بالمجتمع يفتك بناب ومخاليب
خص بشهر الخير لا اقبل وهلي
واذا تكاتفنا ترى ماهو صعيب
وشخص تسول دون حاجة يذلي
محمد بن ابراهيم الفهيد - الزلفي
في دارنا يا ناس كثروا الأجانيب
بكثر التسول يا عساها تولي
حمله ورا حمله و كله أكاذيب
عند المساجد دايمن ما تكلي
ساروا على درب الكذب والألاعيب
وصاروا حجر عثرة للي يصلي
ريان محمد الخنيفر- أشيقر
تسعة وتسعين تبي تشحذ الجيب
وجيه مغسولة بالمرق ما تملّي
لهم جداول في المواقع وترتيب
وفي كل مسجد تشغل اللي يصلي
عصابات كذب تظهر بمظهر الطيب
اتجر من المشحوذ كم من وكلي
سعود عبدالعزيز الهزاع - نعام
عند الاشارة والمحطة مناديب
راح الحياء وصارة عادة جبلي
لا خوف يردعهم ولا راي مصيب
ليل ونهار ما تكل وتملي
صارة تجارة جد ضمن المكاسيب
متى تزول ياخوك بالله قلي
صالح السالمي
بيت الاسبوع
يكتبه للصفحة الشاعر عثمان إبراهيم الرشيد من الرياض حول اهمية صلة الرحم ويقول:
الواصل اللي ياصل اللي قطع فيه
وصل الرحم طاعة لرب العبادي
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011