بيت وصدى

كان بيت الأسبوع الماضي للشاعر مطلق بن منير المسند من القصيم ويقول حول انقطاع الكهرباء المتواصل على الكثير من القرى والهجر في انحاء البلاد ومدى معاناة المواطنين وخاصة مع هذا الشهر الكريم والحرارة الشديدة ويقول:
ليه انقطاع الكهربا صار عادي
ياناس سوى الحر فينا سوايا
وكان صدى البيت من الشعراء
اهمال واضح بالادارة وكادي
اعمالهم قله وتبغى مزايا
الكهرباء لازم لكل العبادي
بالمدن وايضا بالهجر والقرايا
لعل في الشهر نلقى اجتهادي
ويصير حل المشكلة بالنوايا
علي رشيد الرشييد / رياض الخبراء
حنا بعز الصيف ونبي البرادي
ومهما أنادي ما يلبي ندايا
ومهما رفعنا الصوت وصرنا ننادي
ما من مجيب والنتايج خفايا
حنا بشهر الصوم يكفي العنادي
ويش السبب يا ناس قلنا كفايا
محمد عبد العزيز الخنيفر - أشيقر
اي بالله ان الكهربا يابن عادي
تقطع ليا جا الظهر مابه خفايا
يابن رمال اكتب وفيك السدادي
المشكله متفشيه بالقرايا
ماهي جديده كل عام تعادي
وركاب صيانتهم نشوفه ونايا
راضي غانم العنزي/الشملي
أهمال من بعض الاوادم و كادي
خطيتن مهيب مثل الخطايا
شهر رمضان وقيض والحر زادي
حن ويش انسوى بس ويش السوايا
يا ناس من يسمع لصوت المنادي
ناسن ترى تهمل وناسن ضحايا
سعد صنهات السهلي/الدرعية
الكهرب التيار وسط البلادي
الضغط عالي والكيابل عرايا
يخف ضغط الحمل وقت البرادي
يشتد وقت الحر فوق العلايا
كيف انقطاع الكهرب اليوم عادي
وحنا نشوف الدعم واكثر مزايا
عبد المحسن المحيسن/ رياض الخبراء
يالكهرباء زوّد حمولٍ جدادي
الحر كايد ماعليكم خفايا
مالك عذر لو كان باطراف وادي
شمسٍ تخلي كل جلدٍ شوايا
" صحيح أيام وقيض شدادي
ويا المشترك خفف تزين النوايا
عثمان ابراهيم الرشيد/ الرياض
والله تفلنا العافيه يالستادي
لا زانت النومه تجيه البلايا
مادري هو اهمال او انه عنادي
الحاصل ان الوضع فيه الخفايا
بالمدن مابه مشكله ياسنادي
المشكله تلقاه وسط القرايا
فهد عبدالرزاق الرمال/جبه
لامن حسيب ولارقيب ينادي
ولانظام يضبط اهل النوايا
لاماعليهم وقت حروبرادي
وفاتورتك تجي مبالغ كوايا
لوماتسددجاك علم هجادي
المشكله تاخذ دعوم ومزايا
حمد عبدالله الوايلي/حوطة سدير
يا كثر ماهو ينقطع فالبلادي
وخصوص في الذروة يجيه البلايا
كم من سنة والحل ما زال غادي
يا ناس في التيار صارت قضايا
خوفو من الله فالبشر يا عبادي
شهرٍ فضيلٍ احسنو فالنوايا
سعود عبدالعزيز الهزاع - نعام
مهما شكيت اليوم زادوا العنادي
يا ما شكينا ولا تفيد الشكايا
الكل قال ليت يحقق مرادي
ومهما حكينا ما تفيد الحكايا
هذي رسالة قلتها من فؤادي
نشكي على اللي عالم بالخفايا
ريان محمد الخنيفر - أشيقر
الله يعز حكامنا والبلادي
ويخزيك يالغادر خبيث النوايا
الكيبل المدفون ولا العدادي
ولا تسليك البيت بليا مزايا
يا مطلق اصبر لين يجيك البرادي
بعد طلوع سهيل وعيد الضحايا
شجعان بن سعود المقاطي - الرياض
بيت الاسبوع
يكتبه للصفحة الشاعر حمد عبدالله الوايلي من حوطة سدير حول ظاهرة انتشرت بشكل لافت للانظار وهي ظاهرة التسول والاساليب الجديدة له وخطورة العصابات التي تدير هؤلاء المتسولين ويقول:
ياناس شفنا للتسول اساليب
مدري عن الصادق ومدري عن اللي
نستقبل صدى هذا البيت بثلاثة أبيات فقط تدور حول هذا الموضوع ويفضل الإرسال عبر الإيميل:
rb-khozama@alriyadh.com
أو على الفاكس 4871070/ 011