بيت وصدى

الأسبوع الماضي كان بيت الأسبوع من طرح الشاعر محمد عبدالعزيز الخنيفر من أشيقر والذي يقول:
الخطا وارد وصعب من طبيب
مرة يخطي وينهي له سليم
والبيت يناقش موضوع الأخطاء الطبية وكان صدى البيت من الشعراء:
الطبيب اللي بطبه ما يصيب
لا يقرب للمريض اللي سقيم
نبغي اللي دايماً عقله لبيب
يفهم العلة بتشخيص فهيم
والوزارة لازم انها تستجيب
تشكر الفاهم وتنظر فالغشيم
مبارك بن فراج بن شاهر السبيعي - رماح
الخطا باقي وهذا شق جيب
غلطة الدكتور تبقى بالصميم
والقضيه حالها وضع صعيب
والسليم امن الخطا يرجع سقيم
محمد مرزوق السميري - الرياض
كل جرح من قسى الدنيا يطيب
وكل مجروح من العله سقيم
والبلى واكبر خطى لا خطى الطبيب
علة يبلش بها عقل الفهيم
محمد حمود العضياني - الرياض
مرة صايب ومرات يخيب
البشر صاروا تجارب للغشيم
والخطا ضعف الرقابه والحسيب
والنتايج وقعها دايم أليم
والطبيب اللي يعالج له طليب
والجزاله ما شفى حزن الحليم
فهد بن عقيل الطويان.. بريدة
الدكاتر عندنا تبغى طبيب
يفحص الدكتور بالعقل السليم
الشهادة لاحظوها يا نجيب
لا تكون مزوره والله عليم
ما نعم وفيه المخطي والمصيب
جاك رد البيت وافهم يا فهيم
محمد ابو دحيم - البدائع
الخطا اللي ينتج اضراراً وعيب
لا يعالج في الحديث ولا القديم
عاهة صحية ويمكن ما تطيب
كود يأذن ربنا الوالي الكريم
الطبيب اللي من المرض قريب
يزرع الامال خير مستديم
عقاب بن سقيان العتيبي - الجمش
ياما قرينا ثم سمعنا يالحبيب
عن كوارث ذا الدكاتر يا فهيم
من يحاسب ذا الخطا وين الرقيب
كارثه تتكرر بشكل مديم
عنصر التقصير حاصل يا لبيب
الله يسهل دربنا الله رحيم
سعود بن سعد الحافي - الرياض
بيت الاسبوع
تجاوباً مع مقترح الأخ حمد عبدالله الوايلي ارسل للصفحة الشاعر مبارك بن فراج السبيعي من رماح هذا البيت حول موضوع عدم كفاية القرض العقاري والمطالبة بزيادته في ظل غلاء مواد البناء والبيت يقول:
قرض العقار اليوم ما يبني البيت
يمكن ولا حتى الحديد إبيجيبه
نستقبل صدى هذا البيت بثلاثة أبيات حول هذه القضية المطروحة وذلك على الفاكس 4871070أو الإيميل Khozama@alriyadh.com
مقترح لقضية بيت الأسبوع القادم
بعث للصفحة الأخ فواز صالح السالم من حائل موضوعاً لبيت الأسبوع القادم وهو قضية انقطاع طيران الخطوط السعودية عن الكثير من مدن مناطق المملكة رغم الحاجة الماسة لها.