ودي أرد ايامي شوي لاخلاف

العمر يا محمد غدت منه الانصاف
وانا الين الحين ينبض وريدي
ينبض بحب الوقت في كل ميقاف
ونفسي تبي اللي راح كله يعيد
ودي ارد ايامي شوي لاخلاف
والله يدبر ما يحب ويريدي
راح العمر مابين مشتاء ومصياف
والنفس تطلبني وهل من مزيدي
تبي تحملني حمولن بالاصناف
وازريت أقنعها وهي ما تريدي
طاف الشهر هذا وهذا الشهر طاف
وأنا من الايام كيف استفيدي
تلعب بي اشوافي على كل الاطياف
وانا مثبتها بقول القصيدي
يا نفس شومي عن ثقيلات واخفاف
عسى بالطاعات ازود رصيدي
والموت مابين المخاليق حذاف
اذا حذف حذفه يقص الحديدي
ودرب ماهو لرضاك يارب ينعاف
ولو كانت بدايته عقد فريدي
تغير الالوان وتروح الاوصاف
وابليس حلمه تحت خضر الجريدي
وابليس يحرسها مهاجم وهداف
ماهو سعيد ولا يحب السعيدي
يبغاك قدامه على النار تنحاف
لأنه حلف قدام رب العبيدي
انه ليا قفلك على كل مشراف
ويزين الاعمال مثل الثريدي
وحنا نزلنا في محلات الاسلاف
ولابد من يوم يحل الشديدي
والناس مابين المدينة والارياف
ماهمها الا البورصة والزبيدي
لو نكسب الدنيا ماقالت لنا كاف
مولعة مع جهلها في الجديدي
عمرك يابن ادم من الوالي لحاف
اذا انكشف جاك الوعد والوعيدي
اعمل ليومن ترتخي فيه الاطراف
ويجيك بالاخبار ساع البريدي
وعن المعاصي حركوا كل مجداف
وفي وادي الطاعات حط الك قيدي