اللغز

كان كاتب اللغز الماضي الشاعر صلاح بن عبدالله اليابس من الدمام ويقول:
رجلين من ضمن الرجاجيل يا أخوان
تميزوا كلن حمل له بنيه
رجيلين معروفين في كل ميدان
ومن راح منهم هي تروح لخويه
وقد توصل للحل شعرا:
عبر الخزامى جاكم الحل مليان
فريقين تلعب مع بعضها سويه
لكل منهم لبس يفرق بالألوان
وللكابتن شارة غير كل البقيه
احمد بن ناصر المحرج - الرياض
يا مرحبا ترحيبة الطيب عنوان
طيب النشاما للنفوس النقيه
رجلين في وسط الملاعب لهم شان
شارة كباتن شايلينه سويه
مقرن متعب الهرف - الرياض
انا اشهد ان اللغز ياناس مليان
من يد صلاح اللغز مافيه زيه
اشارة الكابتن تعرف على شان
ينصى الحكم ويناقشه ليش ذيه
بسام الحربي - الرياض
ياللي بنيت اللغز واللغز مليان
من شاعر معروف ميه بميه
والحل عندي بالملاعب لها شان
هذي علامه واسمها الكبتنيه
عبدالمحسن المحيسن
- رياض الخبراء
بالساحل الشرقي ترى منت عطشان
ماء التحليه يجيك ميه بميه
اشارة الكابتن على كتف فنان
مع الحكم يكلمه عن خويه
بندر محمد ابا العون
- الرياض
إشارة الكابتن لها قدر يا اخوان
وليا لعب يعجبك ما فيه زيه
قايد يوجه فرقته وسط ميدان
مع الحكم يناقشه عن خويه
خليف فهيد الحربي - الرياض
امرحبا ترحيب صدق وعرفان
باللي بنى لغز بيوته قويه
الحل ما يخفى على كل فهمان
إشارة قالوا لها الكابتينيه
علي الرشيد - رياض الخبراء
يا مرحبا واللغز جيد ومليان
والبنت قلنا شارة الكابتينيه
مع كبتن يجون في وسط ميدان
وإلياخرج يعطي الإشاره خويه
محمد ابو دحيم - البدائع
اليابس أبدع في سؤاله وفنان
معروف بالألغاز روحه وجيه
واللغز حله يوم فكرت به بان
هذي علامة تثبت الكابتينيه
طلال الرشيد - الجبيل
لغز قريته يارجاجيل مليان
بالصفحة اللي بالقصايد غنيه
ملاعب الكوره للاثنين عنوان
وكل عطوا له شارة الكبتنيه
خالد نايف الحربي - الدليمية
لغز الأسبوع
كتبه للصفحة الشاعر سعد صنهات السهلي من الدرعيه ويقول:
الا ياويش رجلينن لجو في موقعن مخطور
إعداهم حولهم ياكثرهم بس الله الساتر
تراهم في مكانن بالاسم يا صاحبي مشهور
ترى الله بشر المسلم وربك هدد الكافر
نستقبل الحلول على البريد الالكتروني
rb-khozama@alriyadh.com
أو الفاكس 014871070
كما نرحب بطرح الألغاز الجيدة وننوه بعدم المشاركة الازدواجية بين اللغز وصوت الصورة واختيار احدى الزاوتين.