جلسة نشاما

ياسعود جهز لنا بليهان
نبغى الديار الشماليه
مليت من زحمة السكان
من كثر روحاتي والجيه
حي النخيل اتركه لاهان
وامسك طريق القصيميه
عليك بالهون ياكحيلان
ساهر سوات الحراميه
متوكلين ٍ علي الرحمان
مامعك غير الشقرديه
منصاك حايل بها الشجعان
ياحي طاريها ياحيه
تطرب على شوفها الاعيان
وتسعد قلوب ٍ شقاويه
ياسعود انا خاطري شفقان
لديار من نارهم حيه
لاجيتهم ما انته بندمان
وهموم دنياك منسيه
يالله يامنشي الامزان
يامحيي ارض ٍ سناويه
تسقي الجزيره مطر هتان
لاعلها علها الوسم وسميه
ريح الثري يبعد الاحزان
ومن الصبا نفح شرقيه
والطير يغرد على الاغصان
والارض بالعشب مكسيه
يفوح الخزامى من الريضان
ويطيب ليل الهواويه
جلسة نشاما كما الاخوان
مثل الحرار النداويه
علي الغلا دايم ٍ خلان
سوالف ومزح وجديه
عبدالرحيم سعد المطيري