صوت الصورة

الله خلق جواً.. وبحراً.. وأبرار
وهيّا لها الوالي حياةٍ تناسبها
جزيرةٍ بالصفحة أتسر الأنظار
خضار مع جواً.. لها ناس تعجبها
وبالمواتر حولها صغار .. وكبار
في موطني أمثالها الكل حاببها
سعود عائش الحربي - القاهرة
هذا شعيبٍ جاريٍ جنب طعموس
شكّل جزيره مثل خنجر يماني
وسطه شبابٍ كاشفٍ اسود الروس
معهم جيوبٍ بيض عشر وثماني
لوي معاهم كان أبسبح وباحوس
ألعب مع الشبّان والعمر فاني
عبد العزيز الصالح – القصب
لا والله الا السيل منا ومنا
طوق هل العزم القوي والوناسه
ما كنّه الا وسط تلٍ تثنا
غضي زهر ومكتسي اللول ماسه
والموت لا زاد المطر ثم شقلناء
في غبته من حدر سبعٍ غطاسه
لا تامنه لو وسطك الشوق حنا
قصدك وناسه ثم بعدها تعاسه
محمد بن زايد الحزيمي
طعسٍ بوسط السيل كنّه زقم طير
وإلا طرف عكاز .. وإلا مسدس
يسحر عيون اللي يشوشون للخير
وأهل الجيوب اللي لراسه تودس
عبدالملك عبدالكريم – بريدة
هذي الطبيعه في بلاد الحرمين
ما هي في لندن .. ولاهي بباريس
طعسٍ عليه الناس مثل الشواهيق
منظر خيالي ما خذٍ شكل تقويس
ما كنّه إلا من طعوس الأخوين
الله يفك الطعس من كل تطعيس
خالد ناصر المخيمر – روضة سدير
هذا النفود إمحوّطه سيل حايل
رسم جزيرة رأس خيل أو زرافه
من جاه وحده أو جلب له عوايل
عاش الخطر عزل أو غرق وانحرافه
قيل الأثر به قول للنصح قايل
بالصيف مجرى السيل لازم تخافه
فهد بن عقيل الطويان – بريدة
يا الله دخيلك كشتنا والسيل جار
طوّق الموقع وﻻ فيها مفر
افزعوا يا ناس نبحث عن مسار
كود نلقى ثلمةٍ بيضا قفر
او يجينا سايرٍ من جنب مار
ينقذ الموقف .. وينقذ هالنفر
حمد عبدالله الوايلي - حوطة سدير
ما باقي الا اللي تقل راس تمساح
تجمّعوا كل السواويق فوقه
وما قد خبرنا موترٍ صار سباح
ولا فيه ستره الكل يسبح بطوقه
السيل جمّعهم على الطعس واجتاح
و يارب تستر من كواشف بروقه
سعود بن عبدالعزيز الهزاع - نعام
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة ..
ويا هلا بالجميع..
صورة العدد السابق