صوت الصورة

هذا الفعل ما يصير تنهي حياتك
في ظرف لحظة تفقد الروح يا صاح
خل التفاخر والسعد في نجاتك
وراك نفوسٍ تنتظر كيف ترتاح
هذا انتحارٍ مخطرٍ في مماتك
وأنته على هالحال زودت اجراح
محمد عبد العزيز الخنيفر - أشيقر
يا محاولٍ ترفع غزالة بدباب
البانشي يحتاج للرفع حرّيف
غيرك معه راكب يجي كنه عقاب
وياقف على كفرتين بعالي المشاريف
والحمد لله ما بكم واحد انصاب
الدرب نفد وخاليٍ من المراضيف
سعود بن عبدالعزيز الهزاع - نعام
صورة العدد السابق
هذا فسق والا جهل مع ثواره
والا شبابٍ طايشٍ في المطاعيس
الرجل من ثقله تكنفس ظهاره
قام يتميدح وانتكس خوش تنكيس
ورّط رفيقه ماسكه مع عراره
الله يستر وشل حصل للمتاعيس
عبد العزيز الصالح - القصب
رحنا وطي يا صاحبي جيت وياك
طحنا على ارضٍ شداد وصعيبه
نبي السلامه عسى الروح تفداك
وين الرجال اللي تجيب الطبيبه
عساه يلحق ما بقى من بقياك
وترى العمر ماهوب يرجع تجيبه
حمد عبدالله الوايلي - حوطة سدير
هذا فعل مجنون وأنتم تعرفون
لا تطاوع أهل الشر حذرا يغروك
هذي خطورة يا بشر كيف ترضون
أمك ترى هي بانتظارك مع أبوك
وهذا العمل مرفوض والفعل ما يكون
ضروك ناسٍ للمهالك يودوك
ريان محمد الخنيفر- الرياض
تلعب بدبابك تجول الشوارع
لا تحسبك حرّيف نشمي وشاطر
الفعل هذا جرّبه كل بارع
غلطه بسيطه جرّته للمخاطر
أفعال جتنا مالها حد رادع
شوارعٍ فيها مصايب .. وأضرار
عبدالله الحامد الشريف - الدرعية
يا سايق الدباب بشويش بشويش
لا تعدم الراكب تدمّر حياته
كم واحدٍ راحة حياته سبب طيش
بلمحة بصر ممداه يكتب وصاته
أهل النصايح ما لقوا غير تهميش
لو كان طايح صرت سبّة وفاته
خالد ناصر المخيمر - روضة سدير
مع الحديد المزح تقفاه الأخطار
ولو كنت شاطر لازم تزل نوبه
الله عطاك العقل.. واللب.. وأبصار
واللي جرى توبه.. وتوبه.. وتوبه
سعود عائش الحربي - جدة
نستقبل مشاركاتكم على إيميل الخزامى:
rb-khozama@alriyadh.com
أو الفاكس رقم: 0114871070
ونرحب بمشاركاتكم الشعرية وما تلتقطه
عدساتكم من الصور الهادفة والطريفة..
ويا هلا بالجميع..