صدق المشاعر

دام القصيد أشتات والحرف مطعون
كيف أجمعه وانظم عُقود القوافي
كيف أطرح هْمومي وانا كلي شجون
كيف اقسم احساسي ولاهوب كافي
كيف أضرب دْفوفي وغني لك لْحون
ونا اشتكي من طول ليل التجافي
كل ماحسب حْسابي معك صرت مديون
دمعي يساوي في الغرام إعترافي
حبيبتي مدري بدونك وشْ آكون
أسأل وابي من حضرتِك ردّ شافي
لا لا تقولي لي الهوى سر مكنون
من أجل ليلى قيس مر الفيافي
واصبح يُلقب عقب حبه بمجنون
لانه عشقها وحبها حُب صافي
لو مانبي العذال بالحب يدرون
بعيوننا صدق المشاعر يشافي
معذور لي من صرت عاشق ومفتون
ولقيت بعيونك لسفني مرافي
لاني أحبك حيل واهواك بجنون
ومقدر أعبر عن شعوري بقافي
قلبي بحبك دايم الدوم مسكون
لا تسهري لا تقلقي لا تخافي
نامي وخلي للسهر ليل وجفون
وتْأكدي باني معك دوم وافي
أقسم يمين الله ماخون ماخون
لو ينسكب دم الغدر في طرافي
قبلي كتب شعر الغزل إبن لعبون
ومحمد القاضي وصقر النصافي
وانا كتبته فيك والسبة عْيون
صحّت في الهاجس وهو كان غافي
أقصد عيونك ما دري كيف وش لون
لي سلهمت تسحر بكم من سنافي