دموع الرجال

يالله يالله يالمعبود ياذو الجلال
يامن بيدك الامور تقدر اسبابها
يافارج الكرب والشده وبك الاتكال
تفرج للامة مصيبتها وما صابها
يا شينها ساعة طاحت دموع الرجال
طاحت دموع العيون وغرقة اهدابها
في ذمتي مايطيح الدمع في كل حال
إلا على فقد غالي النفس واحبابها
واللي فقدناه شيال الحمول الثقال
اللي يشيل الحمول ان طاحت اركابها
فهد فهد قائد الأمة كريم السبال
فهد مليك البلاد اللي ربينابها
خادم حرمينها رجل العدل والعدال
مليكنا سيرته للكل يحكا بها
مرحوم جعلك بجنات وقطوف وضلال
عساك في جنة الفردوس تهنابها
الله يبيحك يابو فيصل ياراعي الجزال
ياللي جمايلك عمت لرض واقطابها
كم ضرير على يدك المرض منه زال
والايتام ما غيرك احد ايعاني اتعابها
وياكم وياكم وياكم وش بيحصي المقال
والاقلام ماتحصي الافعال وكتابها
الحاصل انك مليك مايجي لك مثال
في شت الاقطار نفسك مايحلابها
مسيرتك خير شاهد ياوفي الخصال
تطمح لكسب الجمايل وانت كسابها
مرحوم والله يبيحك عد منشى الخيال
نقولها والله اللي يحسب احسابها
والله لو الموت يقبل فالرجال الرجال
ياسكرة الموت لاقول اني اولابها
لن موتتك يافهد صعبه على كل حال
فجيعة خلت الدولة على اعصابها
والشعب ينعيك والله مايخيب لآمال
وآمالنا في مليك يعتق ارقابها
عبدالله اللي له البيعة وله لمتثال
بيعة ولاء مخلصين بها ونحيابها
بيعة قحاطين والبيعة لكم لاتزال
والطفل منا بثدي أمه تغذابها
ولاء- محبه- فداء- طاعة ونضرب مثال
في طاعة أولاة الأمر اللي مضينابها
وندعي هل الجهل والتخريب واهل الظلال
تتوب لله وندعي باقي احزابها
تمت ويالله يالمعبود ياذو الجلال
رحماك في نفس جاها الموت واقفابها
حسن بن علي المسعودي القحطاني