مليكنا المحبوب ربّي يديمه

يالله ياللي لك خضعنا وطعنا
وبأمرك رضينا ماجزعنا وقنعنا
باسمائك الحسنى دعيناك يارب
ندعيك ولكف الضراعه رفعنا
تحفظ زعيم المملكه والد الشعب
اللي بعد أمرك لا وامره طعنا
لو كان بيدينا فدته أغلى الاعمار
ولاذخرنا عنه كلْ ما استطعنا
العاهل اللي ما تغالى علينا
ماله وحاله والفكر دوم معنا
دايم وحنا عنده أبدى من الروح
وبمْحبته حنّا تزايد طمعنا
مليكنا المحبوب ربّي يديمه
ولانلام أن زاد باسمه ولعنا
الشعب كله له على قلب واحد
طيبه على حبّه هو اللي دفعنا
شعبه على حبّه توحد وعاهد
ولو نفترق حنّا عليه أجتمعنا
ظهره صبور وشال الاثقال عنّا
وقلبه كبير وبالمحبه وسعنا
يوم أعلن الديوان بشرى خروجه
من عارم الفرحه عشانه دمعنا
في صورته نفرح وفي سمع صوته
ويدري بنا نفرح ولو ماسمعنا
سلامتك ياللي نحسّ بما حسّه
ويحس فينا قبل نشكي وجعنا
والله يجيرك من صواديف الايام
يا من بفكره للمعالي رفعنا
أجر وثواب وعافيه لاعدمناك
ياللي ألم ظهرك آلمنا ووجعنا
عوض سلامه العنزي