صوت الصورة

الناس وسط السوق والسعر غالي
سعر الغنم مرفوع ما عاد ينطاق
صار النجد بالسوق فوق الخيالي
ترى الغلا موجود في كل الآفاق
علي رشيد الرشيد - رياض الخبراء
في ماضي الدنيا تذكرت الأجداد
ماضي الاصالة والوجيه السفيرة
يوم الضحايا سعراها صاير اعداد
اليوم سعر السوق يشعل سعيره
حمد عبدالله الوايلي - حوطة سدير
حراج الغنم من عام ستة وستين
الرخص فيها وقتها والسموحة
واليوم شوفوا البيع من حول الألفين
والمشتري المسكين كلٍ يلوحه
محمد بن عبدالعزيز الخنيفر - أشيقر
تاريخ ذا الصورة بحي معكال
سوقٍ لها قبل اتساع المدينة
والأضحية في وقتها بمية ريال
تجزي وطيّبة ملحا سمينة
سعود بن عبدالعزيز الهزاع - نعام
سوق الغنم وقتٍ مضى ما حضرناه
أكبر ضحيّة قِيل بريال تشرا
واليوم بيّاع الغنم سعرها أغلاه
خلى ضعيف الحال في حال قشرا
وِدّه إيضحي لكِن الزود خلاه
ضايق وغيرِه فرح في يوم عشرا
فهد بن عقيل الطويان - بريدة
انعام نجدٍ يومها رخاص وسمان
لها نضرةٍ يسعد بها كل مضياف
محبوبةٍ ما بين بدوٍ وحضران
ولاهي بسوق الجلب أنواع وصناف
الله يعيد أيامها ذيك الأزمان
تملأ صحارينا وتكثر بالارياف
عبدالله الحامد الشريف - الدرعية
سوق الغنم ياللي لك الشهم يشتاق
يقضي لزومه لا لفوا له ضيوفه
وش جاك صابك والغلاء بين الأسواق
ما ترحم اللي صعبةٍ له ظروفه
سعر الغنم يا خوي ما عاد ينطاق
حتى الشريطي صار ما به مروفه
خالد بن ناصر المخيمر - روضة سدير
يا من كنتم شباب واليوم شيبان
الكل منكم يفتكر هاذي الصوره
سوق الغنم فيها نعاجٍ وخرفان
يومٍ أحوال المخاليق مستوره
الله يرحم يا سعد ذيك الازمان
مع شحها كلٍ لقا حسب مقدوره
سعود عائش الحربي - القاهرة
اليوم يومك يا الشريطي ولا يفوت
تصيّد اللي يدوّر ضحايا
الكل منكم داخل السوق عكروت
متعلمٍ يعرف جميع المزايا
مادام فالموتر ولك يرفع الصوت
حمّل ولا تكثر عليه الحكايا
غنام مسعود القريني - نعام
العيد حل وباللوازم تولم
سوق الغنم من كثرت الناس مزحوم
كلٍ على قد الفلوس يتكلم
وعلى الضحيّه جاك من يفرق السوم
عبدالله بن عبود السهلي - تبوك
نستقبل مشاركاتكم على إيميل الخزامى :
rb-khozama@alriyadh.com
أو الفاكس رقم: 4871070
ونرحب بما تلتقطه عدساتكم
من الصور النادرة والطريفة
صورة العدد السابق