صوت الصورة

قم يا ولد للسوق أاشر الضحيه
وخيارها دور ولو كان غالي
اسمع كلامي واعتبرها وصيه
الطيب يبغاله قروم الرجالي
راشد إبراهيم آل مغيرة - ضرماء
بيت مربوع وحوله نخل
وراعيه ينظر إلي الذباح
شرى الذبيحه بعيد البخل
ولا نظر للسعر وأرباح
سعود عائش الحربي - القاهرة
ذك الشبب يا زول قبل الضحيه
العيد جاكم والعرب فرحةٍ فيه
وزع لحمها طبخ .. وبر.. وهديه
من يعمل المعروف ربك يجازيه
عبدالمحسن بن محمد المحيسن - رياض الخبراء
تسلم يمين اللي على الطيب ضاري
لاجاه ضيفه لازم إنه يعشيه
لو زادت الأسعار ما هو بداري
طبعه كريمٍ والمواري مواريه
خالد بن ناصر المخيمر - روضة سدير
من يردعك ياللي ذبحت الضحيه
على التراب اذبح ولا من رقابه
متخلف ببستان وبلا هويه
وين الرقيب اللي تبين غيابه
محمد بن عبدالعزيز الخنيفر - أشيقر
انا استر بالي وانشرح خاطري ذا اليوم
وعز الله اني طيب ومنشرح بالي
من شفتنا الرجال يذبح ببيته دوم
ولا راح للمصلخ يمرطسه بنغالي
مبارك بن محمد الضعاوين - وادي الدواسر
ضح بطلي كان الدراهم بمخباك
وخل العرج والعور هي والنطيحه
وحدّ الشفر وأنحر خروفك بيمناك
وسنن سكاكينك وأرح الذبيحه
سعود بن عبد العزيز الهزاع – نعام
أنا أشهد ان البر خير مسفار
إلى صفا لك من الناس قرمين
هذاك يذبح ..وهذا يشب النار
وهذا يبهّر دلته للطيبين
تركي عبدالله شكر – العلا
العيد حل والجماعة يضحون
الزول متحمس .. والآخر يساعد
والبيت منصوبٍ ودايم يهلون
حدوا السنينه ترى الضيف قاعد
حمد عبدالله الوايلي - حوطة سدير
لا جيت سوق الحلال أسعارهم بالألوف
والراتب أخذوه الأولاد ومطاليبهم
يا الله تعين الذي إذا لفوه الضيوف
قدم سمان الغنم وأداء مواجيبهم
علي بن معاضة – الرياض
صورة العدد عدسة إبراهيم السادة
نستقبل مشاركاتكم الشعرية حتى مساء الاثنين
على الايميل الخاص بصفحة الخزامى:
rb-khozama@alriyadh.com
أو الفاكس رقم: 4871070
ونستقبل الصور الهادفة والطريفة
زاوية (صوت الصورة) .. وكل عام وأنتم بخير