صوت الصورة

الشاص ريّح عقب طرق الحزومي
يا ما حلا في فيته فوح براد
تنافسوا بالصيد ناسٍ قرومي
كلٍ مدح في بندقه كل ما صاد
سعد الحماد، روضة سدير
الشاص واقف والنشامى ثلاثه
والكل منهم يبترم كنه الذيب
متقاسمين الطيب مثل الوراثه
وكل أدوات القنص بمؤخر الجيب
فايز فرحان السويلم
الربع للمقناص شدد الرحايل
والشاص من فوقه زهاب ومعاميل
يالله عسى مقناصهم للمسهايل
والصيد من غزلان ذيك الغراميل
عبدالله بن إبراهيم العبودي
صورةٍ للشاص في دو خالي
أهله شديداً والسلق حوله أوقوف
لا واهني من راج بذيك السهالي
والزهر من حوله ألوان وصنوف
سعود عائش الحربي ، القاهرة
من فوق راس الطعس يحلن الاشعار
ويزين جوك مع ربوعك والأصحاب
ويحلى لنا المجلاس مع شبة النار
في جلسةٍ والصيد مالذ وما طاب
محمد بن عبدالعزيز الخنيفر، أشيقر
النشامى زهبوا للصيد عدّه
فوق جيب يقطع وعور الفيافي
ما يروح الخشف لا والله نشدّه
ونعمل الغدوه على روس النيافي
حمد عبدالله الوايلي
البال ودّه بمقناص.. والقلب للبر مشتاق
مع جمع ربعي والأصحاب.. تلقى الخواطر وسيعه
يا سعود قم ولم الشاص.. خابرك للجيب سواق
وازهم على عيد وعقاب.. وقول الوعد بالرفيعه
حامد مطر الرشيدي ، الرياض
توما مازان مطلاع البراري
حان وقته على ما قبل حان
فوق هبسٍ عذابٍ للصحاري
يطوي الخد بالكيلو ثواني
مبارك محمد الضعاوين ، وادي الدواسر
هيضوني هل العزبه وجيب الشاص
عقب التعب ما حلا برد الزباره
واضحٍ الربع جهّزوا السلق للمقناص
وعلى الأرانب نوو شن غاره
محمد سعد القحطاني، الرياض
يا ما حلا المقناص في موسم الصيد
بأرضٍ فضيه والعرب يعرفونه
يا ليتني من طاقم الشاص يا عبيد
واكون انا في رحلةٍ تذكرونه
خليف الحربي، الرياض
أهل السلق ما يقنصون الحبارى
مقناصهم في صوب والطير في صوب
مجهزين الشاص ووزنه سفارى
ومن كنب ابو شيبه يشتالون مندوب
زياد شجعان المقاطي
يا ما حلا الكيف جنب الشاص
من دلةٍ توها مسوات
لا صرت ناوي على المقناص
انتا وربعك هل الهقوات
عبدالكريم عبدالرحمن السلوم، القرائن
يا محلا الصيد والبران
في أرضنا بالسعوديه
والجمع من نقوة الخلان
ما هي من العقل منسيه
صورة العدد الماضي
راضي بن علي المطرفي - الخرج