شِفت كِل الظلم في دَمعة رحيلك

شِفت وشَلون الثَواني تَشتكي لك
مِن غيابكِ مِن عذابِك مِن ضَماي
أنت يا اللي كِل ما فَكرت أجي لك
تَقصر دروبي .. وما أوصل مَداي
وأرجَع أغفى بين دنياي ورحيلك
غَفوة اللي رايحٍ باله وجَاي
فيك يا اللي مَا كِسرت إلا خَليلك
وما تَركت مِن الرحيل .. إلا عَناي
ليش تتَركني ويَهجرني جَديلك
أتعَب الكَفين .. في ذِكرى مَعاي
هو بلاي : إني عَجزت ألقى سَبيلك
أو سبيلك يا نظر عَيني بلاي
عَاشِقك مَا شَاف بالدنيا بَديلك
لو عذارى الأرض تستَعطف رضاي
بَس ما يَملا .. العيون إلا جَميلك
وجهك اللي يَشبة الغيم بسماي
صِرت أغني صَاحبي يا حَبني لك
ودني لك ، هاتني لك ، مِن عَماي
أسمع بصوت المُهندس دعوتي لك
وألف مَقطوعة أعنونها رجاي
كِل شيٍ يا حَبيبي راح بي لك
الأغاني والشِعر وإبريق شاي
كَانت الدَنيا حَبيبي تَشتهي لك
ضَحكة سنونك وتَرسم لي هَناي
بَس رَحت ! وما تَركت إلا قتيلك
شَاعرك .. يا اللي مقصر في دواي
شِفت كِل الظلم في دَمعة رحيلك
يوم قِلت محمد إنساني .. وباي
لَعنبو دارك وكيف ألقى مثيلك
وأنت ما غيرك تَربع في حشاي
جيت لك..مثل كِل مَرة أجي لك
ما عَرفت مِن الغَرام إلا عَطاي
جيت .. لا تسأل وش اللي جابني لك
الهوى وإلا الأمل وإلا شقاي
محمد الطيار / حائل