نموت وعزة النفس حيّة

هل رمضان وهل بعده هلالين
وانا على الحروه تصفق يديه
يا زاهي ٍ مصيوغ واحد وعشرين
ماهوب حق اللي تسويه فيه
عرضتني للدين وملاوع البين
وسود ٍ شلاهيب ٍ سهرهن خطيه
وهرج العفون الفاجرين المظلين
هذار الالسن مهتوين الرديه
غاراتهم يمي من يسار ويمين
ارد ذيه واتصدا لذيه
كني على الجبهه عقيد الجراشين
في هيته في حرة الجوهريه
ياذاه ما حنا على الدوم حيين
ودنياك ما دامت لخير البريه
عدني بوصل ٍ يدمح الشين يازين
وصل ٍ تهنى فيه روح ٍ شقيه
وصل ٍ يدوم سنين وسنين وسنين
تضرب به الامثال صبح وعشيه
وصل ٍ على وضح النقا يا ادعج العين
ما هوب وصل ٍ بين حسنه وسيه
انا عزيز وعزتي ترفض الشين
ومبداي ما يرضى علي الدنيه
اما نعيش احباب عيشة عزيزين
ولا نموت وعزة النفس حيه
هندي بن عبدالله البقمي