سلطان كل الخير نسل السلاطين

في فجر يوم السبت أربع وعشرين
من شهر ذي القعدة تزايد همومي
عام الف واربع واثنين وثلاثين
جاني خبر من سبته عفت نومي
ياشين يوم السبت منا بناسين
نهار ذاك السبت لا عاد يومي
مات الفقيد اللي حريص على الدين
راعي السجايا الغانمة والعزومي
(سلطان كل الخير) نسل السلاطين
تبكيه نجد ومملكتنا عمومي
وكل الدول حكامها جو معزين
تسابقوا ينعون قرم القرومي
الشعر يعجز لو يسطر دواوين
عن ذكر كل خصال جزل العلومي
ولو العمر يشرى شرينا له سنين
مير القدر معروف عجل وجزومي
ولو العمر يفدى لفينا ملايين
بارواحنا نفديه محدٍ يلومي
ما ظن ننسى طلته لو بعد حين
يبقى اسم (سلطان) فوق النجومي
محد مثل (سلطان) في العسر واللين
زود على الفزعات زين السلومي
والله يكون بعون كل المساكين
يبكيه طفل وشيخ وامٍ رحومي
يا الله يا منزل تبارك وياسين
تغفر (لبو خالد) وتجلي الغمومي
يا عل قبره روضة من رياحين
وعساه في الفردوس ظلٍ يدومي
وصلاة ربي عد ذكر المصلين
على رسولٍ هاديٍ كل قومي
إبراهيم بن حسن بن مبارك الجريسي