عواكيس

* أحلى تحية يامعكوس تعودنا منك الصراحة دائما ماتوافقني الرأي أن الهلال بحاجة ماسة للتعاقد مع مهاجم أجنبي هداف يصنع الفارق لأنه بصراحة مشكلة الهلال في هجومه وكفاية مجاملة لياسر على حساب الفريق ونبغى مهاجم محلي بارز لو من الدرجة الأولى يكون بدل وليد الجيزاني.
أبوصالح الرياض
- قال ابوصالح وبوصالح صادق عز الله ماسمعوا قولك وبتشوف درزن مدافعين من كوريا!
* العزيز معوكس متى يتم اعلان مدرب المنتخب السعودي الجديد وهل تتوقع ان يكون اسما مغمورا؟
احمد السعيد- الرياض
-انا أول مرة أشوف اتحاد كرة يعلن عن مجهول؟!
*عزيزي معوكس برأيك من يحب الشهرة أكثر؟
محمدالمرشدي - حائل
- ماغيره عاشق الفلاشات مع ايتو وفيجو!
* الناقد الساخر معوكس ماهو الهدف من ترشيح احمد محتسب لرئاسة الاتحاد وهل تظن انه سينجح في قيادة النادي؟
محمد ناشري- جدة
- الهدف بهدفين والكأس لقوه مع احلام!
* الصديق معوكس ماذا تتوقع لمستقبل بعض اللجان خاصة عقب قضية السعران؟
خالد الفريدي- المدينة المنورة
- يحولونها لجان أراضي!
* ارجو ان تجاوبني بصراحة يامعوكس .. ليش بعض الصحفيين تكلموا عن مقاطعة الهلال لبعض البرامج ولاموه.. ويوم غيره فعل نفس الشيء سكتوا؟
سالم الدوسري- الافلاج
-سكتوا وضموهم لمنتخب الصم!
* صراحة يامعوكس مسكت رأسي معقولة.. العالمي مطالب بتسديد 14 مليون يورو.. احس ان الامر فيه لبس؟
حامد المطيري- الدمام
- شويه لبس الجماعة من بكرا عرقوا وخذ ياعتذارات من كثرها غيروا اسم البرنامج الى"اعتذار"!
* قل لنا رأيك بكل صدق هل انت مع او ضد تصريح ماجد عبدالله وفي كل الحالتين لماذا؟
عبدالمعين الحميد - حفر الباطن
-ابوعبدالله ابخص من حقه يقول اللي يبي المشكلة في الملاقيف "الحصريين" اللي دخلوا على الخط وقاموا يبررون ويبربرون!
* العملاق معوكس ما مدى رضاك عن بعض البرامج.. وبعدين وش قصة الغمز بين بعض المذيعين والضيوف يعني في تكتيك خلف الكواليس؟
-قلتها من قبل البرامج حلت مكان مسرحيات عادل امام وطارق العلي ما غير ضحك على ذا المهابيل هذا يمطط حلقة والثاني يستعرض بازارير وكبكبات وخامسهم أهبلهم!
* لماذا ما تصير ناقد حصري يامعوكس لبعض البرامج يمكن يضرب معك الحظ والا ضربوك على رأسك؟
صالح الدهمشي - عرعر
-مادام "ابورياح" و"ابن شاكر" نقاد الله يرحم النقد واشوى انها ماتترجم بالانجليزية ولا كان فشلونا!
* برأيك ماهو الخط الفاصل بين "التلميع" والشحاذة لدى البعض؟
حمدان الصيعري -نجران
-هذولا ماعندهم خط فاصل على طول نواصل الشحاذة والتلميع الساطع!
* صراحة يامعوكس بهذلنا عزيز يوم يحضر التدريبات وعشر ايام ما نشوفه.. صراحة ان اصابع الاتهام تشير الى جنابك؟
زيد الشراري- تبوك
- ابوعزيز تطور واختصرها برسالة بالجوال وعلق على كول مي أنا مااغير طبعي!
• عقبال مانشوفك يامعوكس ومعك دفترتك ومذكراتك في الاستوديو تحلل المباريات؟
سليمان العقيل - قصر بن عقيل
- الدفاتر خلصت من المكتبات خاصة ابوسلك والسبب محلحل حصري!
الحبيب ابو العواكيس تحية وبعد اولا اعتذر لك عن الغياب والله كنت مشغول تعرف البزنس والمشكله صديقي ابوعبيد راح فيها في الاسهم تكفى وش الدبره ياصديقي؟
صديقك-حمد الدوسري-ابومبارك
-الدبره مالكم الا سوق الحمام الاسهم على كيفكم ارانب وحمام ودجاج وهاليومين لايفوتكم سهم الضبان خضر ومنسب!
قاهرهم وحابس دمهم عكوسي تحيه وبعد هل تتوقع اذا شارك عبدالغني الليله تمر المباراة بسلام
بندر العصاي - عنيزة
-بسلام وانبراشات ونريد لك سلامتك سلامتك وافتح ياسمسم!