كل الخصال الحميدة فيك محصورة

يا هاجس الشعر دام الشعر جا دوره
عاطني علومك من أولها إلى آخرها
هات الشوارد ترى ما هيب معذوره
وأنا على أخذ الجزله وأصخرها
شاعر مؤثر ويطرب كل جمهوره
يتعب على اللي تنومس لين يظهرها
بعض القصائد على الشاعر تجي عوره
إن كان ما قيل صح السان شاعرها
ان كان ما جبت غيداً زينت الصوره
والا هجرت القصائد مع منابرها
دام القصايد هدفها وصف أخو نوره
مالي عذر كان ما طيبت خاطرها
مليكنا كلنا جنده تحت شوره
ما همنا اللي دعاياته يفسرها
أوامره شامله ما هيب مقصوره
عمت على الشعب كله يوم صدرها
الناس بأوامره فرحه ومسروره
كلمة شكر باسم كل الشعب أكررها
استبشري يا فيافي نجد وصخوره
تلاحم الشعب والقائد مفاخرها
يا راية الحق والتوحيد منصوره
بأمر الولي ما يجيها ما يعكرها
في ظل حصن البلاد ودرعه وسوره
قائد مسيرة وطنا اللي مسيرها
محاسنك يا طول العمر مذكورة
ما فيه واحد من ابنا الشعب ينكرها
كل الخصال الحميدة فيك محصورة
كنك تدور عليها ثم تخيرها
أعمالك الطيبة للناس مشهوره
كل المخاليق تعرفها وتشكرها
خيرك على المدن وأهل البر وبحوره
في خدمة أهل الوطن نفسك مسخرها
نفرش لك الورد والريحان وزهوره
كرامة للملوك اللي تقدرها
بلادنا اليوم بالأفراح مغموره
لبسة ثياب الفرح بأبهى مناظرها
يالله عسى المملكة بالدين معموره
وعدوان الإسلام جعل الله يدمرها
وصلاة ربي عدد ما هلت شهوره
على رسول من أهل الشرك طهرها
سهل بندر حياد المقاطي